ဘာစီလိုနာနည်းပြ ဇာဗီက အသင်းရဲ့ တိုက်စစ်မှူး လီဝန်ဒေါစကီးနဲ့ပတ်သက်လို့ သူကိုယ်တိုင် အံ့အားသင့်မိရတဲ့ အကြောင်းပြချက်တခုကို ဖွင့်ဟပြောကြားလာပါတယ်။ လီဝန်ဒေါစကီးဟာ ပြီးခဲ့တဲ့နွေမှာ ဘိုင်ယန်မြူးနစ်ကနေ ပြောင်းရွှေ့ကြေး ယူရိုသန်း (၄၀) နဲ့ ပြောင်းရွှေ့လာခဲ့တာပါ။
အဆိုပါ ပိုလန်တိုက်စစ်မှူးဟာ ကတ်တလန်မြေမှာ အချိန်တိုအတွင်း ခြေစွမ်းပြ ဂိုးသွင်းယူပြီး အသင်းမှာ အထိုင်ကျလာခဲ့ပါတယ်။ အသက် (၃၄) နှစ်အရွယ် လီဝန်ဒေါစကီးဟာ အသင်းအတွက် ပြိုင်ပွဲစုံ (၈) ပွဲမှာ (၁၁) ဂိုးသွင်းယူပေးထားပါတယ်။
လီဝန်ဒေါစကီးဟာ ဘာစီလိုနာ ကစားသမားဘဝ ပထမဆုံး ချန်ပီယံလိဂ်ပွဲမှာလည်း ဗစ်တိုးရီးယားပါလ်ဇန်ဘက်ကို ဟက်ထရစ် သွင်းယူနိုင်ခဲ့ပါတယ်။ မနေ့က ကစားခဲ့တဲ့ အယ်လ်ချီနဲ့ လာလီဂါအိမ်ကွင်းပွဲမှာလည်း လီဝန်ဒေါစကီးက (၂) ဂိုး သွင်းယူကာ ခြေစွမ်းပြနိုင်ခဲ့ပါသေးတယ်။
ဒီလိုမျိုး လီဝန်ဒေါစကီးနဲ့ ပတ်သက်လို့ ဇာဗီက “လီဝန်ဒေါစကီးရဲ့ လူသားဆန်မှုအပိုင်းနဲ့ပတ်သက်လို့ ကျနော်က အံ့အားသင့်နေရတာပါ။ သူက အရမ်းကို နှိမ့်ချတတ်ပြီး ကတိကဝတ်ရှိတယ်၊ နိုင်ပွဲတွေနဲ့ သွင်းဂိုးတွေကို အမြဲတမ်း ဆာလောင်နေတတ်သူပါ” လို့ ပြောကြားခဲ့ပါတယ်။
ဘီဘီစီရဲ့ အချက်အလက်တွေအရ လီဝန်ဒေါစကီးဟာ လာလီဂါမှာ (၅၆) မိနစ် ကစားတိုင်း တဂိုးသွင်းယူထားတယ်လို့ သိရှိရပါတယ်။ ဘာစီလိုနာကလည်း လက်ရှိ လာလီဂါမှာ (၆) ပွဲကစားပြီးချိန်မှာ အဖွင့်တပွဲ သရေကျထားတာကလွဲရင် ကျန်တဲ့ပွဲအားလုံးမှာ နိုင်ပွဲရရှိခဲ့ပါတယ်။