စပါးတိုက်စစ်ကစားသမား ဆွန်ဟောင်မင်ဟာ လက်စတာနဲ့ပွဲမှာ ဟက်ထရစ်သွင်းယူကာ ခြေစွမ်းပြနိုင်ခဲ့ပြီးနောက် သူ့အပေါ် စိတ်ရှည်သည်းခံပေးခဲ့ကြတဲ့ ပရိသတ်တွေနဲ့ အသင်းဖော်တွေကို ကျေးဇူးတင်စကား ပြောကြားခဲ့ပါတယ်။
ဒီပွဲမှာ ဆွန်ဟောင်မင်က အရန်ခုံသာထိုင်ခဲ့ရပြီး ဒုတိယပိုင်း (၅၉) မိနစ်မှ လူစားဝင်ကစားခွင့်ရရှိခဲ့တာပါ။ ဒါပေမယ့် ဆွန်ဟောင်မင်က ဟက်ထရစ်သွင်းယူနိုင်ခဲ့ပြီး ဒီဟက်ထရစ်ကလည်း (၁၃) မိနစ်အတွင်း သွင်းယူနိုင်ခဲ့တာဖြစ်ပါတယ်။
ဆွန်ဟောင်မင် လူစားဝင်လာချိန်မှာ စပါးက လက်စတာကို ၃-၂ ဂိုးနဲ့ ဦးဆောင်ထားတာဖြစ်ပြီး ဆွန်ဟောင်မင် ဝင်လာပြီးနောက်ပိုင်း ဆွန်ရဲ့ ဟက်ထရစ်နဲ့ ၆-၂ ဂိုးနဲ့ အနိုင်ရရှိသွားခဲ့ပါတယ်။ ဒီပွဲက သွင်းဂိုးတွေဟာ ဆွန်အတွက် ဒီရာသီ ပထမဆုံး သွင်းဂိုးတွေလည်းဖြစ်ခဲ့ပါတယ်။
ပွဲအပြီးမှာ ဆွန်ဟောင်မင်က “ကျနော့်အနေနဲ့ အရင်ပွဲတွေမှာတည်းက အခုထက် ပိုကောင်းအောင် ကစားနိုင်ခဲ့သင့်တာပါ။ အဲ့ဒီအတွက်လည်း ကျနော် စိတ်ပျက်ခဲ့ရပါတယ်။ အသင်းက တကယ်ကောင်းနေပါတယ်”
“ဒါပေမယ့် ကျနော့်ရဲ့ စွမ်းဆောင်ရည်နဲ့ပတ်သက်လို့ စိတ်ပျက်မိပါတယ်။ ဒီရာသီမှာ ကျနော့်အဆုံးသတ်ပိုင်းက ဆိုးရွားခဲ့ပါတယ်။ လူကျွံနေတာတွေ၊ ဂိုးဘားတန်းထိခဲ့တာတွေလည်း ကံဆိုးခဲ့ပါတယ်။ ဒါပေမယ့် ဂိုးတွေရတော့မှာကို ကျနော် သိထားပြီး မစိုးရိမ်ခဲ့ပါဘူး”
“အခုလို ပြန်လာနိုင်ခဲ့တဲ့အတွက်ရော၊ အသင်းကို ကူညီပေးနိုင်ခဲ့တဲ့အတွက်လည်း ကျနော် တကယ် ဝမ်းသာပါတယ်။ ဒါက တကယ်ကို အရေးကြီးတဲ့ကိစ္စဖြစ်ပြီး နိုင်ငံအသင်းအတွက် ခွန်အားအပြည့်နဲ့ သွားနိုင်တော့မှာပါ။ အရိုးသားဆုံးပြောရရင် ကျနော် စိတ်လှုပ်ရှားခဲ့ပါတယ်”
“ပရိသတ်တွေဆီက အံ့အားသင့်ဖွယ် အားပေးမှုတွေအတွက် ကျေးဇူးတင်ပါတယ်။ ကျနော်က အသင်းဖော်၊ ပရိသတ်တွေကို ကျနော့်ရဲ့ ဆိုးရွားတဲ့ပုံစံနဲ့ စိတ်ပျက်စေခဲ့တယ်လို့ ခံစားခဲ့ရပါတယ်။ သူတို့က ကျနော့်ကို အမြဲတမ်း အားပေးခဲ့ကြပါတယ်” လို့ ပြောကြားခဲ့ပါတယ်။
