အင်္ဂလန်လက်ရွေးစင်နည်းပြ ဆောက်ဂိတ်ဟာ ယူနိုက်တက်နောက်ခံလူ မက်ဂွိုင်းရားရဲ့ လက်ရွေးစင် ပွဲထွက်ခွင့်တနေရာကို အာမခံချက်ပေးထားကြောင်း သိရှိရပါတယ်။
မက်ဂွိုင်းရားဟာ ယူနိုက်တက်မှာ ပုံမှန်ပွဲထွက်ခွင့် ပျောက်ဆုံးသွားခဲ့ပြီး အရံခုံမှာသာ ထိုင်နေရတော့တာပါ။ ဒီကစားသမားဟာ လီဗာပူး၊ ဆောက်သမ်တန်၊ လက်စတာတို့နဲ့ သုံးပွဲဆက်တိုက်လုံး ပါဝင်ကစားခွင့်မရရှိခဲ့ပါဘူး။
ဒါ့အပြင် နည်းပြတန်ဟက်ခ်ကလည်း ဗာရန်းနဲ့လီဆန်ဒရိုမာတီနက်ဇ်အတွဲကိုသာ ပွဲထုတ်တော့မှာဖြစ်တယ်လို့ အရိပ်အမြွက်ပြောကြားထားပါတယ်။ အသင်းခေါင်းဆောင်ဖြစ်တိုင်းလည်း အမြဲတမ်း ကစားခွင့်ရမှာ မဟုတ်ဘူးလို့ အသိပေးထားပါတယ်။
လာမယ့် နိုဝင်ဘာမှာ (၂၀၂၂) ကာတာကမ္ဘာ့ဖလားကို စတင်ကျင်းပတော့မှာဖြစ်ပြီး (၂) လဝန်းကျင်သာ လိုတော့ချိန်မှာ မက်ဂွိုင်းရားက ပုံမှန်ပွဲထွက်ခွင့် ပျောက်ဆုံးသွားတာပါ။ အဲ့ဒါကြောင့် သူ့အနေနဲ့ အင်္ဂလန်လက်ရွေးစင်နေရာကိုပါ ဆုံးရှုံးနိုင်တယ်လို့ သုံးသပ်နေကြပါတယ်။
ဒါပေမယ့် သတင်းတွေရဲ့ဖော်ပြချက်အရ အင်္ဂလန်လက်ရွေးစင်နည်းပြ ဆောက်ဂိတ်ဟာ မက်ဂွိုင်းရာဆီ တိုက်ရိုက်ဆက်သွယ်ပြီး လက်ရှိ ယူနိုက်တက်မှာ အရံခုံထိုင်နေရတာက သူ့ရဲ့ လက်ရွေးစင်နေရာနဲ့ ပွဲကစားချိန်ကို အကျိုးသက်ရောက်မှုရှိနိုင်မှာမဟုတ်ကြောင်း အာမခံထားတယ်လို့ သိရှိရပါတယ်။
မက်ဂွိုင်းရားဟာ ဆောက်ဂိတ်စိတ်ကြိုက် ကစားသမားတယောက်ဖြစ်ပြီး မက်ဂွိုင်းရားကို အင်္ဂလန်ပရိသတ်တွေ ဝေဖန်လှောင်ပြောင်ချိန်မှာတောင် မားမားမတ်မတ် ရပ်တည်ကာကွယ်ပေးခဲ့သူတယောက်ဖြစ်ပါတယ်။