ယူနိုက်တက်အသင်းနည်းပြ အဲရစ်တန်ဟတ်က အသင်းမှာ ဒဏ်ရာရကစားသမားတွေအလွန်များပြားတဲ့ အခြေအနေကို ကြုံတွေ့ခဲ့ရပြီးနောက် သူ့ရဲ့နည်းပြဘဝမှာ ဒီလိုမျိုးဒဏ်ရာအများအပြားရတာကို မကြုံတွေ့ခဲ့ဖူးဘူးလို့ဆိုခဲ့ပါတယ်။
ယူနိုက်တက်အသင်းဟာ ဒီနေ့ကစားမယ့် ပဲလေ့စ်အသင်းနဲ့ပွဲမတိုင်ခင်မှာ ဗဟိုနောက်ခံလူ မက်ဂွဲယားဟာ လေ့ကျင့်ရေးကွင်းမှာ ရရှိခဲ့တဲ့ ကြွက်သားဒဏ်ရာကြောင့် ၃ ပတ်ကြာအနားယူရတော့မှာဖြစ်ပါတယ်။အဲ့ဒါကြောင့် ယူနိုက်တက်အသင်းဟာ ဗဟိုခံစစ်မှူး အားလုံးဒဏ်ရာရနေတဲ့ အခြေအနေတွေနဲ့ ကြုံတွေ့နေရတာပါ။ဒါပေမယ့် အီဗန်စ်ဟာ မကြာသေးခင်က အသင်းနဲ့ လေ့ကျင့်မှုတွေပြန်လည်ပြုလုပ်နိုင်ခဲ့တာကြောင့် ပဲလေ့စ်အသင်းနဲ့ပွဲစဉ်ကို ပါဝင်နိုင်ဖွယ်ရှိနေပါတယ်။
အဲရစ်တန်ဟတ်က “(၁၀)နှစ်ကျော် နည်းပြဘဝမှာ ဒီလိုမျိုးဒဏ်ရာအများအပြားရတဲ့ အတွေ့အကြုံကို မကြုံတွေ့ခဲ့ဖူးပါဘူး။နေရာအချို့မှာဆိုရင် ကျနော်တို့အတွက် ရွေးချယ်စရာမရှိပါဘူး။ဒီလိုဒဏ်ရာအခက်အခဲတွေဟာ ၁၀ နှစ်မှာတစ်ကြိမ်ဖြစ်နိုင်ပါတယ်”လို့ဆိုခဲ့ပါတယ်။
ပဲလေ့စ်အသင်းနဲ့ပွဲကို ခံစစ်ကစားသမား ၅ ဦး၊ဘယ်နောက်ခံလူ ၂ ဦးအပြင် ရက်ရှ်ဖိုဒ့်၊တော်မီနေးနဲ့ မာရှယ်တို့လည်း လွဲချော်ဖွယ်ရှိနေတာပါ။ဒဏ်ရာကြောင့် ဒီပွဲကို လွဲနိုင်တယ်လို့သတင်းထွက်နေတဲ့ အသင်းခေါင်းဆောင် ဘရူနိုဖာနန်ဒက်စ်ကိုတော့ နည်းပြ အဲရစ်တန်ဟတ်က ကြံ့ခိုင်မှုအပြည့်နဲ့ ပါဝင်နိုင်ဖို့ မျှော်လင့်နေတာဖြစ်ပါတယ်။
