ဘာစီလိုနာနည်းပြ ဇာဗီက အက်သလက်တီကိုထံ အငှားချထားတဲ့ တိုက်စစ်ကစားသမား ဂရစ်ဇ်မန်းနဲ့ ပတ်သက်လို့ ဖွင့်ဟပြောကြားလာပါတယ်။ အဆိုပါ ပြင်သစ် ကစားသမားဟာ အက်သလက်တီကိုမှာ (၂) ရာသီအငှား စာချုပ်နဲ့ သွားကစားနေတာပါ။
လာမယ့်နွေရာသီမှာ သူ့ရဲ့အငှားစာချုပ်က ကုန်ဆုံးမှာဖြစ်ပြီး နှစ်သင်းကြား သဘောတူညီချက်တွေအရ အက်သလက်တီကိုက ဒီကစားသမားကို ယူရိုသန်း (၄၀) ပေးပြီး မဖြစ်မနေ ခေါ်ယူရမှာဖြစ်ပါတယ်။ ဒါပေမယ့် အက်သလက်တီကိုက ဒါကို လက်တလုံးခြားလုပ်ဖို့ ပြင်ဆင်နေပါတယ်။
ဒီရာသီမှာ ဂရစ်ဇ်မန်းက အက်သလက်တီကိုအတွက် မိနစ် (၆၀) နောက်ပိုင်းမှ လူစားဝင်ကစားခွင့်ရရှိနေပြီး ဒါက ဒီကစားသမားကို ပွဲချိန်တွေရဲ့ (၅၀) ရာခိုင်နှုန်းအထက် ကစားခွင့်မပေးလိုတာကြောင့်ပါ။ တကယ်လို့ စောစောစီးစီး အသုံးပြုခဲ့မယ်ဆိုရင် စာချုပ်ပါ အချက်က အသက်ဝင်သွားမှာဖြစ်ပါတယ်။
ဂရစ်ဇ်မန်းကို အက်သလက်တီကိုက ခေါ်ယူလိုပေမယ့် ယူရိုသန်း (၄၀) က စျေးကြီးတယ်လို့ ယူဆနေတာဖြစ်ပါတယ်။ ကစားသမားကတော့ ဒီပြဿနာကို အမြန်ဆုံးဖြေရှင်းပေးဖို့ ဆန္ဒရှိနေပါတယ်။
ဂရစ်ဇ်မန်းကိစ္စနဲ့ပတ်သက်လို့ ဇာဗီက “ကျနော့်အမြင်က ဘာမှအပြောင်းအလဲမရှိပါဘူး။ ဒါက အသင်းကိုမေးရမယ့်မေးခွန်းဖြစ်ပြီး ကျနော့်ကိစ္စမဟုတ်ပါဘူး။ ကျနော် ဂရစ်ဇ်မန်းအကြောင်းကိုလည်း မပြောခဲ့ဖူးပါဘူး”
“ဒါက အက်သလက်တီကို-ဘာစီလိုနာရဲ့ ပြဿနာပါ။ ကျနော့်ပြဿနာမဟုတ်တဲ့ အသင်းရဲ့ ကိစ္စတခုပါ။ ကျနော့်စီးပွားရေး ဘာတခုမှမပါသလို ငြင်းခုန်နေရမယ့် ကိစ္စလည်း မဟုတ်ပါဘူး။ သူက အက်သလက်တီကို ကစားသမားတယောက်ပါ” လို့ ပြောကြားခဲ့ပါတယ်။