မန်စီးတီးတိုက်စစ်မှူး ဟာလန်းက သူ့အသင်းနည်းပြ ဂွါဒီယိုလာရဲ့ နည်းစနစ်ပိုင်းတွေက ရှုပ်ထွေးဆန်းပြားကြောင်း ဖွင့်ဟပြောကြားလာခဲ့ပါတယ်။ ဒီကစားသမားဟာ ပြီးခဲ့တဲ့နွေရာသီမှာ ဒေါ့မွန်ကနေ မန်စီးတီးကို ပြောင်းရွှေ့လာခဲ့တာပါ။
ဟာလန်းဟာ မန်စီးတီးအတွက် ဒီရာသီ ပြိုင်ပွဲစုံ (၇) ပွဲကစားပြီးချိန်မှာ သွင်းဂိုး (၁၂) ဂိုးအထိ ရရှိခဲ့ပါတယ်။ ဒါ့အပြင် ပရီးမီးယားလိဂ်မှာလည်း (၆) ပွဲကစားပြီး ဟက်ထရစ် (၂) ကြိမ် ရရှိထားပါတယ်။
ဟာလန်းဟာ ဂွါဒီယိုလာ အားကိုးရတဲ့ ကစားသမားအဖြစ် ချက်ချင်းနေရာယူလာခဲ့ပြီး သူနဲ့ပတ်သက်လို့ ဂွါဒီယိုလာကလည်း အများကြီး အကာအကွယ်ပေး၊ အထောက်အပံ့တွေပေးနိုင်ဖို့ ကြိုးစားနေပါတယ်။ ဟာလန်းက ဂွါဒီယိုလာနဲ့ ပတ်သက်လို့လည်း အခုလိုပဲ ပြောကြားလာခဲ့ပါတယ်။
ဟာလန်းက “ကျနော့်အထင် ဂွါဒီယိုလာကလည်း ဘောလုံးနဲ့ပတ်သက်လို့ ကျနော့်လိုမျိုး ကြောင်တောင်တောင်တွေဖြစ်လေ့ရှိတယ်ထင်ပါတယ်။ နှစ်ယောက်လုံးက ဘောလုံးကို ချစ်မြတ်နိုးကြပါတယ်။ သူက ကစားသမားဖြစ်ဖူးပြီး နည်းပြလည်းဖြစ်လာခဲ့ပါတယ်”
“သူက ဘောလုံးလောကနဲ့ ပတ်သက်လို့ ရူးသွပ်ပြီး ဒါကိုလည်း ကျနော် သဘောကျပါတယ်။ ဘာကြောင့်လဲဆိုတော့ ဂွါဒီယိုလာက ဘောလုံးနဲ့ပတ်သက်လာရင် အရာရာတိုင်းကို လိုက်ပြီးစဥ်းစားနေလို့ပါ။ ဘယ်အရာကို ဘယ်လိုပိုကောင်းအောင်လုပ်ရမလဲဆိုတာလည်း တွေးနေတာပေါ့”
“အဲ့ဒါကြောင့်လည်း ကျနော် သူ့ကို သဘောကျတာပါ။ သူ့ရဲ့နည်းစနစ်တွေက တကယ်ကို ရှုပ်ထွေးပြီး ကျနော်က အဲ့ဒီအသင်းမှာ အထိုင်ကျအောင် တတ်နိုင်သလောက် မြန်မြန်ကြိုးစားခဲ့ရပါတယ်။ ဘာလို့လဲဆိုတော့ အချိန်မရှိလို့ပါ” လို့ ပြောကြားသွားခဲ့ပါတယ်။