ပီအက်စ်ဂျီအသင်းဟာ ရာသီသစ်လီဂူးဝမ်းပွဲစဉ်အတွက် ပြင်ဆင်မှုတွေပြုလုပ်နေပေမယ့် ဘတ်ပီဟာ ပထမအသင်းနဲ့အတူ လေ့ကျင့်မှုပြုလုပ်ခြင်းမရှိသေးဘူးလို့ သိရပါတယ်။
ဘတ်ပီဟာ ရီးရယ်လ်အသင်းထံ ပြောင်းရွှေ့ချင်နေတာကြောင့် ပီအက်စ်ဂျီအသင်းရဲ့ စာချူပ်သက်တမ်းတိုးမယ့် ကမ်းလှမ်းမှုကို ငြင်းဆန်ထားတာပါ။ဘတ်ပီဟာ ပီအက်စ်ဂျီရဲ့စာချုပ်သစ်ကို ငြင်းဆန်ထားပြီး စာချုပ်ကုန်ဆုံးမယ့် ၂၀၂၄ နွေရာသီမှာ အလွတ်နဲ့ ထွက်ခွာဖို့ ရှိနေတာဖြစ်ပါတယ်။
အဲ့ဒါကြောင့် ပီအက်စ်ဂျီအသင်းဟာ ဘတ်ပီကို အလွတ်နဲ့ မဆုံးရှုံးရအောင် အခုအပြောင်းအရွှေ့မှာ ရောင်းချဖို့ လုပ်ဆောင်နေတာပါ။ဒီလိုအကြောင်းတွေကြောင့်ပဲ ပြင်သစ်ကလပ်ဟာ ဘတ်ပီကို အာရှခရီးစဉ်ရဲ့အသင်းလူစာရင်းမှာ ချန်လှပ်ခဲ့တာဖြစ်ပါတယ်။
ဆော်ဒီကလပ် အယ်လ်ဟီလယ်အသင်းဟာ ဘတ်ပီကို ကမ္ဘာ့စံချိန်တင်ပြောင်းရွှေ့ကြေးနဲ့ ကမ်းလှမ်းခဲ့ပေမယ့် ကစားသမားက မပြောင်းရွှေ့ချင်တာကြောင့် ဒီကိုယ်စားလှယ်တွေနဲ့ တွေ့ဆုံဖို့ ကို ငြင်းဆန်ခဲ့တာပါ။ဘတ်ပီဟာ လက်ရှိအချိန်မှာ အသင်းရဲ့ A အစုအဖွဲ့နဲ့လေ့ကျင့်မှုပြုလုပ်ခြင်းမရှိတာဖြစ်ပါတယ်။
A အစုအဖွဲ့ဟာ ပီအက်စ်ဂျီအသင်းရဲ့လီဂူးဝမ်းအဖွင့်ပွဲစဉ်မှာ ပါဝင်နိုင်မယ့် ကစားသမားတွေဖြစ်တယ်လို့ သိရပါတယ်။ဘတ်ပီကတော့ ပီအက်စ်ဂျီအသင်းက ဘယ်လိုပဲ ကမ်းလှမ်းကမ်းလှမ်း စာချုပ်ကုန်ဆုံးတဲ့အချိန်ထိ ဆက်ရှိပြီး အလွတ်နဲ့ ထွက်ခွာဖို့ကိုပဲ ဦးတည်နေတာဖြစ်ပါတယ်။
