လီဝန်ဒေါစကီးကတော့ ဘာစီလိုနာအသင်းက ကာဒစ်ဇ်အသင်းကို ၄ ဂိုး- ဂိုးမရှိနဲ့ အနိုင်ရတဲ့ ပွဲမှာ လူစားဝင်ကစားသမားအဖြစ် ပါဝင်ခွင့်ရခဲ့ပေမယ့် ခြေစွမ်းပြပြီး ဂိုးသွင်းယူ၊ ဂိုးဖန်တီးသွားတာဖြစ်ပါတယ်။
ဒီပွဲစဉ်ရဲ့ပထမပိုင်းမှာ ဂိုးမရှိသရေကျနေခဲ့တာဖြစ်ပြီး ဒုတိယပိုင်းမှာ ၄ ဂိုးသွင်းယူခဲ့တာပါ။ဒုတိယပိုင်းမှာ ဒီဂျောင်က ဦးဆောင်ဂိုးစတင်သွင်းယူခဲ့တာဖြစ်ပါတယ်။လီဝန်ဒေါစကီးဟာ ပွဲချိန် ၅၇ မိနစ်မှာ လူစားဝင်ခဲ့တာပါ။ပွဲချိန် ၆၅ မိနစ်မှာ လီဝန်ဒေါစကီးက ဒုတိယဂိုးသွင်းခဲ့တာဖြစ်ပါတယ်။
ဒါ့အပြင် လီဝန်ဒေါစကီးဟာ အန်ဆုဖာတီနဲ့ ဒမ်ဘီလီတို့ရဲ့ဂိုးတွေကိုလည်း ဖန်တီးသွားခဲ့တာပါ။ပိုလန်တိုက်စစ်မှူးဟာ ဒီရာသီမှာ ဘာစီလိုနာအသင်းအတွက် ၆ ပွဲကစားအပြီးမှာ ၉ ဂိုးသွင်းယူပြီး ၂ ဂိုးဖန်တီးခဲ့တာဖြစ်ပါတယ်။
ဘာစီလိုနာအသင်းဟာ ဒီနိုင်ပွဲကြောင့် ရီးရယ်လ်အသင်းမကစားခင် ရမှတ် ၁၃ မှတ်နဲ့ လာလီဂါ အမှတ်ပေးဇယား ထိပ်ဆုံးနေရာမှာ ရပ်တည်နိုင်ခဲ့တာပါ။
ဘာစီလိုနာအသင်းဟာ ကြားရက်မှာ ချန်ပီယံလိဂ်ပွဲစဉ်အဖြစ် ဘိုင်ယန်မြူးနစ်အသင်းနဲ့ ယှဉ်ပြိုင်ရမှာဖြစ်ပြီး လီဝန်ဒေါစကီးဟာ အသင်းဟောင်းနဲ့ ပြန်လည်တွေ့ဆုံရမှာ ဖြစ်ပါတယ်။
