ဆာအဲလက်စ်ဖာဂူဆန်ရဲ့ လက်ထောက်နည်းပြဟောင်း မူလန်စတင်းက ကာရာဘောင်းဖလားရတုန်းက အလွန်အကျွံအောင်ပွဲခံခဲ့တဲ့ အသင်းဟောင်းရဲ့ အောင်ပွဲခံမှုကို ဝေဖန်သွားခဲ့တာဖြစ်ပါတယ်။
ယူနိုက်တက်အသင်းဟာ ကာရာဘောင်းဖလားဗိုလ်လုပွဲမှာ နယူးကာဆယ်အသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး နှစ်ပေါင်း ၆ နှစ်ကြာဆုဖလားနဲ့ ဝေးကွာတာကို အဆုံးသတ်နိုင်ခဲ့သလို နည်းပြ အဲရစ်တန်ဟတ်လက်ထက် ပထမဆုံးဆုဖလားလည်း ရယူနိုင်ခဲ့တာဖြစ်ပါတယ်။
ယူနိုက်တက်အသင်းဟာ လက်ရှိအချိန်မှာ လီဗာပူးလ်အသင်းရဲ့ ဖိအားပေးခြင်းခံနေရတဲ့ လာမယ့်ရာသီ ချန်ပီယံလိဂ်ဝင်ခွင့်ရဖို့အတွက် လက်ကျန် ၃ ပွဲမှာ ၂ ပွဲအနိုင်ရဖို့ လိုအပ်နေတာပါ။မြို့ခံပြိုင်ဘက် မန်စီးတီးကတော့ ဒီရာသီမှာ ဆုဖလား ၃ လုံးရယူနိုင်ဖို့ ပစ်မှတ်ထားနေပြီး ယူနိုက်တက်နဲ့ အက်ဖ်အေဖလား ဗိုလ်လုပွဲ ကစားဖို့ ရှိနေပါတယ်။
လက်ထောက်နည်းပြဟောင်း မူလန်စတင်းက ယူနိုက်တက်အနေနဲ့ ကြီးမားတဲ့ စွမ်းဆောင်ရည်နဲ့ စွမ်းဆောင်နိုင်ဖို့ လိုအပ်နေတာဖြစ်ပြီး ကာရာဘောင်းဖလားရတုန်းက အလွန်အကျွံအောင်ပွဲခံခဲ့တဲ့ အပေါ် ဝေဖန်မှုပြုလုပ်ခဲ့တာပါ။
မူလန်စတင်းက “ယူနိုက်တက်အသင်းဟာ ကာရာဘောင်းဖလားအောင်ပွဲခံအပြီးမှာ ပြဿနာနည်းနည်းရှိခဲ့ပါတယ်။ယူနိုက်တက်အနေနဲ့ ကာရာဘောင်းဖလားကို အောင်မြင်ခဲ့တာက ကောင်းပါတယ်။ဒါက နည်းပြတိုင်းအလိုရှိတဲ့အရာပါ။ပျော်လည်းပျော်ရွှင်ရမှာဖြစ်သလို အောင်ပွဲခံရမှာလည်းဖြစ်ပေမယ့် အလွန်အကျွံတော့ မလုပ်သင့်ပါဘူး”
“ချန်ပီယံလိဂ်ဖလားရသလိုမျိုးတော့ အောင်ပွဲမခံပါနဲ့။ဒါက အနည်းငယ်တော့ ကိစ္စရှိခဲ့ပါတယ်။ကာရာဘောင်းဖလားကို ရရုံနဲ့ ယူနိုက်တက်က ပျော်ရွှင်နိုင်မှာမဟုတ်ပါဘူး။မန်စီးတီးနဲ့ ယှဉ်ပြိုင်ရမယ့် ကြီးမားတဲ့ အခွင့်အရေးတစ်ခုရရှိထားပါတယ်”လို့ ဆိုခဲ့ပါတယ်။
