အင်္ဂလန်ကွင်းလယ်လူ ဘယ်လင်ဂမ်ဟာ ရီးရယ်လ်အသင်းက ဘီလ်ဘာအိုအသင်းကို အနိုင်ရရှိခဲ့တဲ့ လာလီဂါပွဲဦးထွက်မှာ ခြေစွမ်းပြပြီး သွင်းဂိုးပါ သွင်းယူနိုင်ခဲ့ပါတယ်။
ဘယ်လင်ဂမ်ဟာ အခုနွေရာသီအပြောင်းအရွှေ့ကာမှ ဒေါ့မွန်အသင်းကနေ ပေါင် ၈၈.၅ သန်းနဲ့ ရီးရယ်လ်အသင်းထံ ပြောင်းရွှေ့လာခဲ့တာပါ။ဘယ်လင်ဂမ်ဟာ ဘီလ်ဘာအိုအသင်းနဲ့ပွဲမှာ ရီးရယ်လ်အသင်းရရှိတဲ့ ဒုတိယဂိုးကို Volley ကန်ချက်နဲ့ ကန်သွင်းယူနိုင်ခဲ့တာဖြစ်ပါတယ်။
ဘယ်လင်ဂမ်ဟာ ၂၀၀၇ က ဒေးဗစ်ဘက်ခမ်းနောက်ပိုင်း ရီးရယ်လ်အသင်းအတွက် ပြိုင်ပွဲမှာ ဂိုးသွင်းယူနိုင်တဲ့ ပထမဆုံးအင်္ဂလန်ကစားသမားအဖြစ် မှတ်တမ်းဝင်ခဲ့ပါတယ်။ဘယ်လင်ဂမ်ဟာ ပြီးခဲ့တဲ့ ရီးရယ်လ်အသင်းရဲ့ရာသီကြိုခြေစမ်းပွဲတွေမှာလည်း ခြေစွမ်းပြသနိုင်ခဲ့ပြီး ယူနိုက်တက်ကို အနိုင်ရခဲ့တဲ့ ခြေစမ်းပွဲမှာလည်း ဂိုးသွင်းယူနိုင်ခဲ့ပါတယ်။
အန်ဆယ်လော့တီက “ဘယ်လင်ဂမ်က ထူးချွန်တဲ့ကောင်လေးပါ။သူက အရည်အသွေးတွေကို ပြသနိုင်သလို၊ကိုယ်ရည်ကိုယ်သွေးနဲ့ အလုပ်ကိုကြိုးစားတဲ့သူပါ။သူက အလွန်တော်ပါတယ်။သူကအလွန်စိတ်အားထက်သန်သူဖြစ်ပြီး အလွန်အရေးပါတဲ့ခေါ်ယူမှုပါ”လို့ ဆိုခဲ့ပါတယ်။
ရီးရယ်လ်အသင်းဟာ ပြီးခဲ့တဲ့ရာသီက လာလီဂါဖလားကို ဘာစီလိုနာအသင်းထံ ပေးခဲ့ရတာကြောင့် ဒီရာသီမှာ ရယူနိုင်ဖို့ စိတ်ပိုင်းဖြတ်ထားတာဖြစ်ပါတယ်။