ယူနိုက်တက်အသင်းနည်းပြ အဲရစ်တန်ဟတ်က ဘာစီလိုနာအသင်းကို အနိုင်ရခဲ့တဲ့ ယူရိုပါလိဂ်ပလေးအောဖ့် ဒုတိယအကျော့ပွဲစဉ်မှာ ဒီဂျောင်ကို အကောင်းဆုံးရပ်တန့်နိုင်ခဲ့တဲ့ ဖရက်ဒ်ကို ချီးကျူးသွားခဲ့တာဖြစ်ပါတယ်။
ယူနိုက်တက်အသင်းဟာ ဒီပွဲမှာ ဘာစီလိုနာအသင်းကို ၂ ဂိုး- ၁ ဂိုးနဲအနိုင်ရခဲ့ပြီး နှစ်ကျော့ပေါင်းရလဒ် ၄ ဂိုး- ၃ ဂိုးနဲ့ အနိုင်ရကာ ၁၆ သင်းအဆင့်တက်နိုင်ခဲ့တာပါ။ဒီပွဲမှာ လီဝန်ဒေါစကီးက ဘာစီလိုနာအတွက် ပင်နယ်တီကနေ ဦးဆောင်ဂိုးသွင်းခဲ့ပေမယ့် ဖရက်ဒ်က ချေပဂိုးသွင်းပြီး အန်တိုနီက အနိုင်ဂိုးသွင်းပေးခဲ့တာဖြစ်ပါတယ်။
အဲရစ်တန်ဟတ်က “ဖရက်ဟာ အရေးပါတဲ့ အခန်းကဏ္ဍမှာရှိပါတယ်။ဒီဂျောင်ကို ရပ်တန့်ဖို့က ဦးစားပေးဖြစ်ပြီး သူဟာ ဒီဂျောင်ကို ခြင်တစ်ကောင်လိုကပ်ပြီးကစားနိုင်ခဲ့ပါတယ်။သူဟာ ပထမအကျော့မှာလည်း အလွန်ကောင်းမွန်စွာစွမ်းဆောင်နိုင်ခဲ့သလို ဒီပွဲမှာဆိုရင် ဂိုးပါသွင်းယူနိုင်ခဲ့ပါတယ်။တကယ်ကိုတောက်ပခဲ့ပါတယ်”လို့ ပြောခဲ့တာဖြစ်ပါတယ်။
ဖရက်ဒ်ဟာ ဘာစီလိုနာအသင်းနဲ့ နှစ်ကျော့စလုံးမှာ ကောင်းမွန်တဲ့ စွမ်းဆောင်ရည်ကို ပြသနိုင်ခဲ့ပြီး ဒီရာသီ နည်းပြ အဲရစ်တန်ဟတ်အားကိုးရတဲ့ အနေအထားမှာရှိနေတာပါ။ဖရက်ဒ်ဟာ ဒီရာသီမှာ ယူနိုက်တက်အတွက် ၅ ဂိုးသွင်းယူထားပြီး သူ့ရဲ့ယူနိုက်တက်အကောင်းဆုံးရာသီလို့တောင်ပြောလို့ရတာဖြစ်ပါတယ်။
ယူနိုက်တက်အသင်းဟာ တနင်္ဂနွေနေ့မှာတော့ ကာရာဘောင်းဖလားဗိုလ်လုပွဲအဖြစ် နယူးကာဆယ်အသင်းနဲ့ ဝင်ဘာလေမှာ ယှဉ်ပြိုင်ရမှာဖြစ်ပြီး ဆုဖလားလက်မဲ့ဖြစ်တာကို အဆုံးသတ်နိုင်မလားဆိုတာ ကြည့်ရမှာဖြစ်ပါတယ်။