ယူနိုက်တက်အသင်းနည်းပြ အဲရစ်တန်ဟတ်ဟာ ဆီဗီလာအသင်းကို ၃ ဂိုး- ဂိုးမရှိနဲ့ အရေးနိမ့်ခဲ့တဲ့ ယူရိုပါလိဂ်ကွာတားဖိုင်နယ်ဒုတိယအကျော့ပွဲစဉ်မှာ အမှားအယွင်းတွေ ပြုလုပ်ခဲ့တဲ့ ဂိုးသမား ဒီဂီယာကို အပြစ်မတင်သွားခဲ့တာဖြစ်ပါတယ်။
ဒီဂီယာဟာ ၃ ဂိုးစလုံးမှာ အမှားမကင်းခဲ့တာကြောင့် ဝေဖန်ခံနေရတာဖြစ်ပါတယ်။ပထမဂိုးမှာလည်း ဆီဗီလာကစားသမားတွေ ဖိအားပေးခြင်းခံနေရတဲ့ အသင်းခေါင်းဆောင် မက်ဂွဲယားကို ဘောလုံးပေးပို့ခဲ့တာပါ။ဒုတိယဂိုးဖြစ်တဲ့ ထောင့်ကန်ဘောကိုလည်း ထွက်ပြီး မကာကွယ်နိုင်ခဲ့တာဖြစ်ပါတယ်။
တတိယဂိုးမှာတော့ ဂိုးဧရိယာအပြင်ဘက်မှာရှိနေတဲ့ ဘောလုံးကို ဝင်ပြီးထိန်းခဲ့ရာမှာ ချော်သွားခဲ့လို့ ဆီဗီလာတိုက်စစ်မှူး အန်နက်ဆရီက ဂိုးသွင်းခဲ့တာပါ။ဒီဂီယာဟာ ဒီရာသီမှာ ယူနိုက်တက်အသင်းအတွက် လက်စွမ်းပြသနေပေမယ့် ဒီပွဲမှာတော့ ဆိုးဆိုးရွားရွားကို အမှားကျူးလွန်ခဲ့တာဖြစ်ပါတယ်။
ဒါပေမယ့် နည်းပြကတော့ တစ်သင်းလုံးရဲ့ စွမ်းဆောင်ရည်နဲ့ နိုင်လိုစိတ်ကင်းမဲ့မှုတွေကို ထောက်ပြခဲ့ပြီး ဒီဂီယာကို အပြစ်မတင်သွားခဲ့တာပါ။
အဲရစ်တန်ဟတ်က “သူဟာ ပရီးမီးယားလိဂ်မှာ ဂိုးမပေးရအောင် အများဆုံးလုပ်ထားတဲ့သူပါ။ဒါကို ကြည့်ရရင် သူဟာ အလွန်စွမ်းဆောင်ရည်ကောင်းတဲ့ ဂိုးသမားဖြစ်တယ်ဆိုတာကို ပြသနေပါတယ်”လို့ ဆိုခဲ့တာဖြစ်ပါတယ်။
