ဒီမနက်ပိုင်းက ကစားခဲ့တဲ့ ယူရိုပါလိဂ်ဆီမီးဖိုင်နယ်ဒုတိယအကျော့ပွဲစဉ်တစ်ပွဲဖြစ်တဲ့ လေဗာကူဆင်နဲ့ ရိုးမားအသင်းတို့ပွဲမှာ ဂိုးမရှိသရေကျသွားခဲ့ပါတယ်။
ပထမအကျော့က ရိုးမားအသင်းက ၁ ဂိုး- ဂိုးမရှိနဲ့ အနိုင်ရခဲ့လို့ နှစ်ကျော့ပေါင်းရလဒ် ၁ ဂိုး-ဂိုးမရှိနဲ့ ရိုးမားအသင်းက ယူရိုပါလိဂ်ဗိုလ်လုပွဲကိုတက်နိုင်ခဲ့တာပါ။ပြီးခဲ့တဲ့နှစ်က ယူရိုပါကွန်းဖရန့်စ်လိဂ်ပြိုင်ပွဲမှာ ချန်ပီယံဖြစ်ခဲ့တဲ့ ရိုးမားအတွက် ၂ နှစ်ဆက် ဥရောပပြိုင်ပွဲတွေမှာ ချန်ပီယံဆုရယူနိုင်ဖို့ မျှော်လင့်ချက်တွေရှိလာခဲ့တာဖြစ်ပါတယ်။
လေဗာကူဆင်အသင်းဟာ ဒီပွဲမှာ ဘောလုံးပိုင်ဆိုင်မှု ၇၂ ရာခိုင်နှုန်း၊ ဂိုးပေါက်ကန်သွင်းမှု ၂၃ ကြိမ်နဲ့ ဂိုးပေါက်တည့်မှု ၆ ကြိမ်အထိရှိခဲ့ပေမယ့် ရိုးမားအသင်းဘက်ကို ဂိုးမသွင်းနိုင်ခဲ့တာပါ။ရိုးမားအသင်းကတော့ ဒီပွဲမှာ ဂိုးပေါက်ကန်သွင်းမှု ၁ ကြိမ်သာရှိခဲ့ပေမယ့် ဗိုလ်လုပွဲဆီတက်နိုင်ခဲ့တာဖြစ်ပါတယ်။
ရိုးမားအသင်းဟာ ဗိုလ်လုပွဲမှာ ဂျူဗင်တပ်စ်ကို အနိုင်ရခဲ့တဲ့ ဆီဗီလာအသင်းနဲ့ မေလ ၃၁ ရက် ဘူဒါပတ်စ်မှာ ယှဉ်ပြိုင်သွားမှာဖြစ်ပါတယ်။