ယူနိုက်တက်အသင်းဟာ ဘက်တစ်အသင်းကို ယူရိုပါလိဂ် ၁၆ သင်းအဆင့် ဒုတိယအကျော့ပွဲစဉ်မှာ ၁ ဂိုး- ဂိုးမရှိနဲ့ အနိုင်ရပြီး နှစ်ကျော့ပေါင်းရလဒ် ၅ ဂိုး- ၁ ဂိုးနဲ့ ကွာတားဖိုင်နယ်ကို တက်ရောက်နိုင်ခဲ့တာဖြစ်ပါတယ်။
ပေါလ်စခိုးလ်ကတော့ ကွာတားဖိုင်နယ်ကို တက်ရောက်လာတဲ့ အသင်းတွေထဲက အင်အားနည်းတဲ့ အသင်းနဲ့ ယူနိုက်တက်ကို မတွေ့ဆုံစေချင်ဘဲ အသင်းကြီးတွေဖြစ်တဲ့ ဂျူဗင်တပ်စ်၊ ရိုးမားအသင်းတို့နဲ့ တွေ့ဆုံစေချင်တယ်လို့ပြောခဲ့ပါတယ်။
ဂျူဗင်တပ်စ်အသင်းဟာ ၁၆ သင်းအဆင့်မှာ ဖရိုင်းဘတ်ကို အနိုင်ရခဲ့ပြီး၊ ရိုးမားအသင်းကတော့ ဆိုစီဒက်အသင်းကို ကျော်ဖြတ်ပြီး ကွာတားဖိုင်နယ်ကို တက်ရောက်ခဲ့တာပါ။ပေါလ်စခိုးလ်က “ကျွန်တော်ကတော့ ပွဲကြီးပွဲကောင်းတွေကိုပဲ အမြဲတမ်းလိုချင်ပါတယ်။အိုးထရက်ဖိုဒ့်မှာ ဒီလိုပွဲကြီးတွေကို သဘောကျတာပါ။ယူရိုပါလိဂ်မှာရှိနေတဲ့အတွက် ချန်ပီယံလိဂ်မဟုတ်ဘူးဆိုတာ သိပါတယ်”
“ဒါပေမယ့် ဂျူဗင်တပ်စ်ရဲ့သမိုင်းကြောင့် ပွဲဖြစ်လာရင် ဘယ်လောက်တောင်ကောင်းမလဲ။နှစ်သင်းစလုံးက အရင်အဆင့်မှာမဟုတ်ဘူးဆိုတာ သိပါတယ်။ဒါပေမယ့် သူတို့တွေဟာ ပြန်လာဖို့ လမ်းကြောင်းပေါ်ကို ရောက်နေပုံရပါတယ်။ဒါကြောင့် ကျွန်တော့်အတွက် ဂျူဗင်တပ်စ်နဲ့ ရိုးမားလည်းဖြစ်နိုင်တယ်”လို့ပြောခဲ့တာပါ။
ယူရိုပါလိဂ်ကွာတားဖိုင်နယ်အတွက် မဲခွဲမှုကို ဒီနေ့မှာ ပြုလုပ်သွားမှာဖြစ်ပါတယ်။