အာဆင်နယ်အသင်းဟာ စပို့တင်းလစ္စဘွန်းအသင်းကို ပင်နယ်တီအဆုံးအဖြတ်မှာ အရေးနိမ့်ပြီး ယူရိုပါလိဂ် ၁၆ သင်းအဆင့်ကနေ ထွက်ခွာခဲ့ရပြီဖြစ်ပါတယ်။
ပထမအကျော့ပွဲစဉ်က ၂ ဂိုးစီသရေကျခဲ့ပြီး ဒုတိယအကျော့ပွဲစဉ်မှာ ၁ ဂိုးစီသရေကျခဲ့လို့ အချိန်ပို၊ ပင်နယ်တီအထိ ဆက်ပြီးသွားခဲ့ရတာပါ။ပင်နယ်တီအဆုံးအဖြတ်ခံယူရာမှာတော့ အာဆင်နယ်အသင်းက မာတင်နယ်လီက ဂိုးမဝင်ခဲ့ပဲ စပို့တင်းအသင်းက ၅ ဦးစလုံးဂိုးဝင်ခဲ့တာကြောင့် စပို့တင်းအသင်းက ၅ ဂိုး- ၃ ဂိုးနဲ့ အနိုင်ရခဲ့တာဖြစ်ပါတယ်။
အာတီတာကတော့ သူတို့ဟာ ဒီပြိုင်ပွဲရဲ့နောက်တစ်ဆင့်ကို တက်ရောက်ချင်ပေမယ့် ပင်နယ်တီဆိုတာ ထီထိုးရသလိုပဲဖြစ်တာကြောင့် ပင်နယ်တီကို အားကိုးလို့မရဘူးလို့ ပြောခဲ့တာပါ။
အာတီတာက “ အသင်းအနေနဲ့ နောက်တစ်ဆင့်ကို တကယ်တက်ရောက်ချင်သလို ဒီပြိုင်ပွဲမှာ ဆက်ပြီးတိုက်ပွဲဝင်ချင်တာပါ။ကျွန်တော်တို့ ကြိုးစားခဲ့ပေမယ့်လည်း မလုံလောက်ပါဘူး။ စပို့တင်းအသင်းကိုတော့ နောက်တစ်ဆင့်တက်နိုင်ခဲ့လို့ ဂုဏ်ပြုချင်ပါတယ်”
“တိုမီယာဆုနဲ့ ဆလီဘာတို့ကို စောစောစီးစီးဆုံးရှုံးခဲ့ရ တာကြောင့် ပွဲကိုစီမံခန့်ခွဲရတာခက်ခဲခဲ့ပါတယ်။အသင်းရဲ့ စည်းချက်တွေကို မတွေ့ခဲ့ရပေမယ့် ပွဲပြီးကာနီးနောက်ဆုံးမိနစ် ၂၀ အတွင်းမှာ ကောင်းမွန်တဲ့ စွမ်းဆောင်ရည်ကို ပြန်ရခဲ့ပေမယ့် ဂိုးတော့မသွင်းနိုင်ခဲ့တာဖြစ်ပါတယ်။ပင်နယ်တီကတော့ ထီထိုးရသလိုပဲ”လို့ ဆိုခဲ့ပါတယ်။
အာဆင်နယ်အသင်းဟာ ယူရိုပါလိဂ်ပြိုင်ပွဲမှာ အမြင့်ဆုံးအောင်မြင်မှုအဖြစ် ဗိုလ်လုပွဲအထိသာ တက်ရောက်နိုင်ခဲ့တာဖြစ်ပြီး အခုနှစ်ရာသီမှာ ပရီးမီးယားလိဂ်ဖလားကို ရယူဖို့ ပစ်မှတ်ထားနေတာဖြစ်ပါတယ်။
