ဂျူဗင်တပ်စ်ဂိုးသမား ဆက်ဇနီဟာ စပို့တင်းလစ္စဘွန်းအသင်းနဲ့ ကစားခဲ့တဲ့ ယူရိုပါလိဂ်ကွာတားဖိုင်နယ် ပထမအကျော့ပွဲစဉ်ရဲ့ ပွဲချိန်မိနစ် ၄၀ ကျော်မှာ ရင်ဘတ်အောင့်လာခဲ့လို့ ဆက်မကစားနိုင်တော့ဘဲ အသင်းဖော်တွေကလည်း ဆေးအဖွဲ့ရဲ့ကုသမှုအမြန်ဆုံးခံယူနိုင်ဖို့ လုပ်ခဲ့ရပါတယ်။
ဆက်ဇနီဟာ ကုသမှုခံယူပြီးနောက် ပွဲချိန် ၄၄ မိနစ်မှာ ဂိုးသမား ပီရင်နဲ့ လူစားလဲမှုပြုလုပ်ခဲ့ပြီး ကွင်းထဲကနေ ထွက်ချိန်မှာ ငိုကြွေးနေခဲ့တာပါ။ပရိသတ်တွေကလည်း ဆက်ဇနီကို မက်တပ်ရပ်ပြီး ဂုဏ်ပြုခဲ့ပါတယ်။ပိုလန်ကစားသမားကတော့ စမ်းသပ်မှုတွေပြုလုပ်အပြီးမှာ အရာအားလုံးအဆင်ပြေတယ်လို့ ပြောခဲ့ပါတယ်။
ဆက်ဇနီက “အခုတော့ အဆင်ပြေသွားပါပြီ။စမ်းသပ်မှုတွေပြုလုပ်အပြီးမှာ အရာအားလုံးကောင်းမွန်ပါတယ်။အသက်ရှုူဖို့ ခက်ခဲခဲ့လို့ အနည်းငယ်စိုးရိမ်ခဲ့ရပြီး ကြောက်မိခဲ့ပါတယ်။အဲ့ဒါကြောင့်လည်း မျက်ရည်ကျခဲ့တာပါ”လို့ ပြောခဲ့ပါတယ်။
ဆက်ဇနီနေရာအစားဝင်လာခဲ့တဲ့ ဂိုးသမား ပီရင်ဟာ စပို့တင်းအသင်းရဲ့အပိုင်အခွင့်အရေးတွေကို ကာကွယ်နိုင်ခဲ့ပြီး ဂျူဗင်တပ်စ်အသင်းကို ၁ ဂိုး- ဂိုးမရှိနဲ့ အနိုင်ရအောင် စွမ်းဆောင်ပေးနိုင်ခဲ့ပါတယ်။ဒီပွဲမှာ ဂျူဗင်တပ်စ်အတွက်ဂိုးကို ဂတ်တီက သွင်းယူခဲ့တာပါ။
ဆက်ဇနီဟာ စမ်းသပ်မှုမှာ အရာအားလုံးအဆင်ပြေပေမယ့် လာမယ့် ဆက်ဆူအိုလိုနဲ့ပွဲမှာတော့ ပါဝင်ခွင့်ရ၊မရကိုတော့ စောင့်ဆိုင်းရဖွယ်ရှိနေတာဖြစ်ပါတယ်။