ယူနိုက်တက်ကွင်းလယ်လူ ဘရူနိုဖာနန်ဒက်စ်က အသင်းအနေနဲ့ ယူရိုပါလိဂ်ဖလားကို ရချင်တယ်ဆိုရင် ဘယ်အသင်းနဲ့မဆို ရင်ဆိုင်ရမှာပဲလို့ ဆိုစီဒက်အသင်းကို ၁ ဂိုး- ဂိုးမရှိနဲ့ အနိုင်ရတဲ့ ပွဲအပြီးမှာ ပြောလိုက်ပါတယ်။
ယူနိုက်တက်အသင်းဟာ ဆိုစီဒက်ကိုအနိုင်ရခဲ့ပေမယ့် ဂိုးကွာခြားချက်ကြောင့် အုပ်စုဒုတိယသာရရှိခဲ့တာပါ။အဲ့ဒါကြောင့် ယူရိုပါလိဂ်ပလေးအောဖ့်အဆင့်အဖြစ် ချန်ပီယံလိဂ်ကနေ ဆင်းလာတဲ့ အသင်းတွေနဲ့ ယှဉ်ပြိုင်ရမှာလည်းဖြစ်ပါတယ်။
ယူနိုက်တက်အသင်းဟာ ဒီအဆင့်မှာ ဘာစီလိုနာ၊ အေဂျတ်စ်၊ဂျူဗင်တပ်စ်၊ ဆီဗီလာစတဲ့ အသင်းတွေနဲ့ ယှဉ်ပြိုင်ရဖို့ ရှိနေတာပါ။
ဘရူနိုဖာနန်ဒက်စ်က “ဒါကို ကျွန်တော်တို့ ကြည့်ဖို့ မလိုပါဘူး။ကျွန်တော်တို့ဟာ ဒါကို ရှောင်နိုင်ဖို့ အရင်လုပ်ခဲ့ပါတယ်။ဒါပေမယ့် အခု ကျွန်တော်တို့ သူတို့ထဲက တစ်သင်းနဲ့ ကစားရပါမယ်။ဒါက ပြဿနာမရှိပါဘူး”
“ပြိုင်ပွဲမှာ ဆုဖလားရချင်ရင် ဘယ်လိုအခြေအနေမှာမဆို အသင်းကြီးတွေနဲ့ ရင်ဆိုင်ရမှာပါ။အနှေးနဲ့ အမြန်ပါပဲ။ဒီအတွက်လည်း ကျွန်တော်တို့ အဆင်သင့်ပါပဲ”လို့ ဆိုခဲ့ပါတယ်။
ယူနိုက်တက်အသင်းဟာ ဒီနိုင်ပွဲနဲ့အတူ ပြိုင်ပွဲစုံ ၉ ပွဲဆက်ရှုံးပွဲမရှိတာလည်းဖြစ်ပါတယ်။ဒီတစ်ပတ်မှာတော့ ပရီးမီးယားလိဂ်ပွဲအဖြစ် အက်စတွန်ဗီလာအသင်းအိမ်ကွင်းမှာ သွားရောက်ယှဉ်ပြိုင်ရမှာဖြစ်ပါတယ်။
