ယူရိုပါလိဂ်ဗိုလ်လုပွဲအဖြစ် ဒီမနက်ပိုင်းက ကစားခဲ့တဲ့ ဆီဗီလာနဲ့ ရိုးမားအသင်းတို့ပွဲမှာ ဆီဗီလာအသင်းက ပင်နယ်တီအဆုံးအဖြတ်မှာ အနိုင်ရပြီး ချန်ပီယံဆုကို ကိုင်မြှောက်သွားနိုင်ခဲ့ပါတယ်။
ပွဲချိန်အတွင်းမှာ ၁ ဂိုးစီသရေကျခဲ့ပြီး အချိန်ပိုမှာလည်း ဂိုးမသွင်းနိုင်ခဲ့လို့ ပင်နယ်တီအထိ ခရီးဆက်ခဲ့ကြရတာပါ။ဒီပွဲမှာ ဒိုင်ဘားလားက ရိုးမားအတွက် ဦးဆောင်ဂိုးသွင်းယူနိုင်ခဲ့ပေမယ့် မန်ချီနီက ကိုယ့်ဂိုးကိုယ်ပြန်သွင်းခဲ့လို့ ပွဲချိန်အတွင်းမှာ သရေကျခဲ့တာဖြစ်ပါတယ်။
ပင်နယ်တီအဆုံးအဖြတ်ကန်သွင်းရာမှာ ရိုးမားအသင်းက ၁ လုံးသာဝင်ခဲ့ပြီး ၂ လုံးလွဲချော်ခဲ့ကာ ဆီဗီလာအသင်းကတော့ ၄ ဂိုးစလုံးဝင်ပြီး အနိုင်ရရှိသွားခဲ့တာဖြစ်ပါတယ်။ဆီဗီလာအသင်းဟာ ဒီပွဲအနိုင်ရခဲ့တာကြောင့် ယူရိုပါလိဂ် ဗိုလ်လုပွဲတက်တဲ့ ၇ ကြိမ်စလုံးအနိုင်ရတဲ့ စံချိန်မှတ်တမ်းကောင်းကို ဆက်ပြီးထိန်းသိမ်းနိုင်ခဲ့တာပါ။
မော်ရင်ဟိုအတွက်တော့ ၆ ကြိမ်မြောက် ဥရောပပြိုင်ပွဲဗိုလ်လုပွဲမှာ ရှုံးပွဲစတင်ကြုံတွေ့ခဲ့ပြီး မှတ်တမ်းကောင်းတစ်ခုကို ရပ်တန့်ခံလိုက်ရတာဖြစ်ပါတယ်။မော်ရင်ဟိုဟာ အရင် ၅ ကြိမ်စလုံးမှာ ချန်ပီယံဖြစ်ခဲ့ပေမယ့် ဒီတစ်ကြိမ်မှာတော့ ဒုတိယနဲ့သာ ကျေနပ်ခဲ့ရတာပါ။
ချန်ပီယံဖြစ်ခဲ့တဲ့ ဆီဗီလာအသင်းကတော့ လာမယ့်နှစ်ရာသီ ချန်ပီယံလိဂ်ပြိုင်ပွဲယှဉ်ပြိုင်ခွင့်ရရှိသွားပြီဖြစ်ပါတယ်။
