နယူးကာဆယ်အသင်းနည်းပြ အက်ဒီဟိုဝီက ပီအက်စ်ဂျီအသင်းနဲ့ ၁ ဂိုးစီသရေကျခဲ့တဲ့ ချန်ပီယံလိဂ်ပွဲစဉ်မှာ ပီအက်စ်ဂျီအသင်းဘက်ကို ပင်နယ်တီပေးခဲ့တဲ့ ဆုံးဖြတ်ချက်ကို အလွန်စိတ်ပျက်မိတယ်လို့ ပြောလိုက်ပါတယ်။
နယူးကာဆယ်အသင်းဟာ ၁ ဂိုး- ဂိုးမရှိနဲ့ ဦးဆောင်ထားချိန်နောက်ဆုံးမိနစ်အရောက်မှာ ပီအက်စ်ဂျီအသင်းက ပင်နယ်တီကန်သွင်းခွင့်ရရှိခဲ့တာပါ။နယူးကာဆယ်အသင်းနောက်ခံလူ လီဗာရာမန်တို ဂိုးဧရိယာအတွင်းလက်နဲ့ ထိခဲ့တယ်ဆိုပြီး ကွင်းလယ်ဒိုင်လူကြီးက VAR ကြည့်ရှုကာ ပီအက်စ်ဂျီအသင်းကို ပင်နယ်တီပေးခဲ့တာဖြစ်ပါတယ်။
ဒီပင်နယ်တီကို ဘတ်ပီက ဂိုးဝင်အောင်ကန်သွင်းနိုင်ခဲ့ပြီး နယူးကာဆယ်အသင်းနိုင်ပွဲမရအောင်လုပ်ဆောင်သွားနိုင်ခဲ့တာပါ။အက်ဒီဟိုဝီကတော့ ပင်နယ်တီပေးခဲ့တဲ့ ဆုံးဖြတ်ချက်အပေါ် အလွန်စိတ်ပျက်နေခဲ့တာဖြစ်ပါတယ်။
အက်ဒီဟိုဝီက “ဒါက ပင်နယ်တီမဟုတ်ပါဘူး။ရင်ဘတ်ကိုထိပြီးမှ လက်နဲ့ ထိခဲ့တာပါ။လက်နဲ့ထိခဲ့ရင်တောင် အလွန်နီးကပ်နေလို့ ဒါက ပင်နယ်တီမဟုတ်ပါဘူး။ရင်ဘတ်နဲ့ အရင်ထိပြီးမှ လက်နဲ့ ထိတာကြောင့် ဒါက ပင်နယ်တီမဟုတ်ပါဘူး။တကယ်ကို ညံ့ဖျင်းလွန်းတဲ့ ဆုံးဖြတ်ချက်ပါပဲ”လို့ ဆိုခဲ့ပါတယ်။
နယူးကာဆယ်အသင်းဟာ နောက်ဆုံးပွဲမှာ အေစီမီလန်အသင်းကို အနိုင်ယူနိုင်ခဲ့ရင်တောင် နောက်တစ်ဆင့်တက်ဖို့က သူတို့ရဲ့လက်ထဲမှာ မရှိတော့ဘဲ ပီအက်စ်ဂျီအသင်းရဲ့ ပွဲအပေါ်မှာသာ မူတည်တော့မှာဖြစ်ပါတယ်။