မန်စီးတီးအသင်းနည်းပြ ဂွာဒီယိုလာက ရက်ဒ်စတားဘဲလ်ဂရိတ်အသင်းကို အနိုင်ရခဲ့တဲ့ ချန်ပီယံလိဂ်ပွဲစဉ်မှာ ခြေစွမ်းပြသနိုင်ခဲ့တဲ့ ရိုဒရီဟာ ဥရောပရဲ့အကောင်းဆုံးကွင်းလယ်ကစားသမားလို့ ချီးကျူးသွားခဲ့ပါတယ်။
မန်စီးတီးအသင်းဟာ ဒီပွဲမှာ ဘူကာရီရဲ့သွင်းဂိုးနဲ့ ရက်ဒ်စတားဘဲလ်ဂရိတ်အသင်းရဲ့ဦးဆောင်ခြင်းကို ခံခဲ့ရပေမယ့် အယ်လ်ဗားရတ်ဇ်က ၂ ဂိုးနဲ့ ရိုဒရီက ၁ ဂိုးသွင်းယူသွားခဲ့တာပါ။အဲ့ဒါကြောင့် ချန်ပီယံလိဂ်လက်ရှိချန်ပီယံအသင်းဟာ ချန်ပီယံဆုကိုကာကွယ်ရမယ့် အဖွင့်ပွဲစဉ်ကို နိုင်ပွဲနဲ့ စတင်နိုင်ခဲ့တာဖြစ်ပါတယ်။
ရိုဒရီဟာ ပြီးခဲ့တဲ့ဘောလုံးရာသီက မန်စီးတီးအသင်းချန်ပီယံဖြစ်စေမယ့်တစ်လုံးထဲသော ဂိုးကို သွင်းယူခဲ့တာဖြစ်ပြီး အခုအချိန်ထိအကောင်းဆုံးပုံစံတွေကို ပြသနေခဲ့လို့ နည်းပြ ဂွာဒီယိုလာရဲ့ချီးကျူးခြင်းကို ရရှိခဲ့တာပါ။
ဂွာဒီယိုလာက “အခုအချိန်မှာ ရိုဒရီက ဥရောပရဲ့အကောင်းဆုံးကွင်းလယ်ကစားသမားပါ။သူဟာ ပိုပြီးကောင်းလာနိုင်သလို တိုးတက်လာနိုင်မယ်လို့ မျှော်လင့်ထားပေမယ့် သူက ထူးခြားတဲ့ကွင်းလယ်ကစားသမားတစ်ဦးပါ။အသင်းက ဒီလိုကစားသမားမျိုးကို ခေါ်ယူခဲ့တာ ကံကောင်းပါတယ်”
“ရိုဒရီဟာ ရောက်လာချိန်တုန်းက ဒီလိုကစားသမားမျိုးမဟုတ်ပေမယ့် အခုတော့ အသင်းခေါင်းဆောင်တစ်ဦးဖြစ်နေပြီး ထိပ်တန်းကစားသမားပါ”လို့ ဆိုခဲ့ပါတယ်။
အသက် ၂၇ နှစ်အရွယ်ရှိ ရိုဒရီဟာ မန်စီးတီးအသင်းအတွက် ၂၁၅ ပွဲပါဝင်ကစားထားပြီး ဂိုး ၂၀ သွင်းယူကာ ပြီးခဲ့တဲ့ရာသီ ဆုဖလား ၃လုံးရယူနိုင်ခဲ့တဲ့ အသင်းရဲ့အစိတ်အပိုင်းလည်းဖြစ်ခဲ့ပါတယ်။