မန်စီးတီးအသင်းတိုက်စစ်မှူး ဟာလန်းဟာ ဘိုင်ယန်မြူးနစ်အသင်းကို ၃ ဂိုး- ဂိုးမရှိနဲ့ အနိုင်ရခဲ့တဲ့ ချန်ပီယံလိဂ်ကွာတားဖိုင်နယ်ပထမအကျော့ပွဲစဉ်မှာ ၁ ဂိုးသွင်းယူပြီးနောက် နောက်ထပ်စံချိန်သစ်တစ်ခုကို ထပ်ပြီးရယူသွားခဲ့ပါတယ်။
ဟာလန်းဟာ ဒီပွဲမှာ သွင်းယူခဲ့တဲ့ ဂိုးကြောင့် တစ်ရာသီသွင်းဂိုး ၄၅ ဂိုးရှိသွားခဲ့ပြီး ပရီးမီးယားလိဂ်ကစားသမားတွေထဲမှာ တစ်ရာသီအတွင်း သွင်းဂိုးအများဆုံးကစားသမားအဖြစ် စံချိန်သစ်တင်နိုင်ခဲ့တာပါ။
ဟာလန်းဟာ ယူနိုက်တက်တိုက်စစ်မှူးဟောင်း နစ္စတယ်ရွိုင်းနဲ့ လီဗာပူးလ်တိုက်စစ်မှူး ဆာလတ်ရဲ့ ၄၄ ဂိုးကို ၁ ဂိုးအသာနဲ့ ကျော်ဖြတ်နိုင်ခဲ့သလို ပွဲအရေအတွက်ကလည်း သူတို့တွေထက် နည်းပါးကာ စံချိန်သစ်ကို ရယူခဲ့တာဖြစ်ပါတယ်။ဟာလန်းကတော့ မန်စီးတီးအတွက် ပထမဆုံးကစားတဲ့ ရာသီမှာတင် စံချိန်သစ်တွေတစ်ခုပြီးတစ်ခုရယူနိုင်ခဲ့တာပါ။
ဒါ့အပြင် ဟာလန်းဟာ ဒေါ့မွန်ကစားသမားဘဝမှာ ဘိုင်ယန်မြူးနစ်ကို အနိုင်မရခဲ့တာကိုလည်း မန်စီးတီးအရောက်မှာ ရပ်တန့်နိုင်ခဲ့ပြီး နိုင်ပွဲရယူသွားနိုင်ခဲ့တာဖြစ်ပါတယ်။လက်ရှိအချိန်မှာ ပြိုင်ပွဲအစုံဟာ ပြီးဆုံးဖို့ ၁၀ ပွဲကျော်ကျန်နေသေးတာကြောင့် ဟာလန်းရဲ့သွင်းဂိုးတွေကို ဆက်ပြီး ရေတွက်ရဖို့ရှိနေတာပါ။
ဟာလန်းဟာ မန်စီးတီးအသင်းနဲ့ သက်ဆိုင်သူတွေအားလုံးလိုချင်နေကြတဲ့ ချန်ပီယံလိဂ်ဖလားကို ဒီရာသီမှာ အရယူပေးနိုင်မလားဆိုတာ စိတ်ဝင်စားဖို့ ကောင်းနေတာဖြစ်ပါတယ်။
