ယူရိုချန်ပီယံ အင်္ဂလန်အသင်းဟာ သြစတြေးလျနဲ့ ကစားခဲ့တဲ့ ခြေစမ်းပွဲမှာ ၂ ဂိုး- ဂိုးမရှိနဲ့ အရေးနိမ့်ပြီး ရှုံးပွဲမရှိစံချိန်ရပ်တန့်သွားခဲ့ပါတယ်။
ဒီပွဲမှာ သြစတြေးလျအတွက်ဂိုးတွေကို ဆမ်ခါးနဲ့ ဂရန့်တို့က သွင်းယူခဲ့တာဖြစ်ပြီး ဆမ်ခါးဟာ ဂရန့်သွင်းယူခဲ့တဲ့ ဂိုးကိုလည်းဖန်တီးပေးနိုင်ခဲ့တာပါ။အင်္ဂလန်အသင်းဟာ ဒီပွဲမတိုင်ခင် နည်းပြ ဝီဂ်မန်းလက်အောက်မှာ ပြိုင်ပွဲစုံ ၃၀ ပွဲဆက်တိုက်ရှုံးပွဲမရှိစံချိန်တင်ထားတာဖြစ်ပါတယ်။
အင်္ဂလန်အသင်းဟာ ယူရိုပြိုင်ပွဲမှာပါ ချန်ပီယံဆုရယူပြီး အကောင်းဆုံးခြေစွမ်းတွေပြသနိုင်ခဲ့ပေမယ့် သြစတြေးလျနဲ့အတွေ့မှာ စံချိန်ကောင်းတစ်ခုရပ်တန့်ခဲ့ရတာပါ။အင်္ဂလန်အသင်းနောက်ဆုံးအရေးနိမ့်ခဲ့တဲ့ ပွဲကတော့ ၂၀၂၁ ဧပြီလက ကနေဒါနဲ့ ပွဲစဉ်ဖြစ်ပြီး ၂ နှစ်ကြာရှုံးပွဲမရှိအောင် ကစားနိုင်ခဲ့ပါတယ်။
အင်္ဂလန်အသင်းဟာ မကြာသေးခင်ကလည်း Finalissima ပွဲစဉ်အဖြစ် ဘရာဇီးလ်အသင်းနဲ့ ကစားခဲ့ရာမှာ ပင်နယ်တီအဆုံးအဖြတ်နဲ့ အနိုင်ရပြီး ချန်ပီယံဆုကို ရယူနိုင်ခဲ့သေးတာပါ။
ဝီဂ်မန်းက “အလွန်ရုပ်ပိုင်းဆိုင်ရာကောင်းမွန်ပြီး စနစ်တကျဖွဲ့စည်းထားတဲ့ သြစတြေးလျအသင်းနဲ့ ရင်ဆိုင်ရတာဟာ ကြီးမားတဲ့ သင်ယူမှုပါပဲ။ကျမတို့ဟာ ဘောလုံးပိုင်ဆိုင်မှုတွေအများကြီးရခဲ့ပြီး ဖန်တီးမှုတွေလည်း ပြုလုပ်နိုင်ခဲ့ပေမယ့် ပွဲကို အရှိန်မြှင့်တင်နိုင်ဖို့ ရုန်းကန်ခဲ့ရပါတယ်။ကျမတို့ အမှားတစ်ချို့လုပ်ခဲ့ပါတယ်”လို့ ပြောခဲ့ပါတယ်။
