ဒေါ့မွန်အသင်းကွင်းလယ်ကစားသမား ဘယ်လင်ဂမ်ဟာ အခုနှစ်ရာသီ ဘွန်ဒစ်လီဂါအကောင်းဆုံး ကစားသမားဆုကို ရရှိသွားခဲ့ပါတယ်။
အင်္ဂလန်ကစားသမားဟာ ဒီရာသီမှာ ဒေါ့မွန်အသင်း ဘွန်ဒစ်လီဂါဖလား ရယူနိုင်မယ့် လက်တစ်ကမ်းအလိုအထိ ရောက်ရှိအောင်ခြေစွမ်းပြသနိုင်ခဲ့တာပါ။ဒေါ့မွန်အသင်းဟာ ဘွန်ဒစ်လီဂါဖလားကို နောက်ဆုံးပွဲမတိုင်ခင်အထိ ရယူနိုင်ဖို့ အခြေအနေကောင်းခဲ့ပေမယ့် နောက်ဆုံးပွဲမှာ မိန့်ဇ်နဲ့ သရေကျခဲ့လို့ ဆုဖလားကို ဘိုင်ယန်မြူးနစ်အသင်းဆီ လွှဲပြောင်းပေးခဲ့ရတာဖြစ်ပါတယ်။
အသက် ၁၉ နှစ်အရွယ်ရှိ ဘယ်လင်ဂမ်ဟာ ဒီရာသီမှာ ဒေါ့မွန်အသင်းအတွက် ဘွန်ဒစ်လီဂါ ၃၁ ပွဲမှာ ၈ ဂိုးသွင်းယူနိုင်ခဲ့တာအပါအဝင် ပြိုင်ပွဲစုံ ၄၂ ပွဲမှာ ၁၄ ဂိုးအထိ သွင်းယူနိုင်ခဲ့တာပါ။အဲ့ဒါကြောင့်လည်း အခုနှစ်ရာသီ ဘွန်ဒစ်လီဂါပြိုင်ပွဲရဲ့ အကောင်းဆုံးကစားသမားဆုကို ရယူနိုင်ခဲ့တာဖြစ်ပါတယ်။
ဒါပေမယ့် ဘယ်လင်ဂမ်ဟာ အခုနွေရာသီမှာ ရီးရယ်လ်အသင်းကို ပြောင်းရွှေ့တော့မှာဖြစ်ပြီး ပြောင်းရွှေ့ကြေးလည်း သဘောတူညီမှုရခဲ့ပြီဖြစ်တာကြောင့် စပိန်ကလပ်ဟာ အပြောင်းအရွှေ့ကို မကြာခင်အချိန်မှာ တရားဝင်ကြေညာနိုင်ဖွယ် ရှိနေတာဖြစ်ပါတယ်။