အချစ်ဆိုတာဆန်းကြယ်တယ်လို့ လူတွေပြောကြပါတယ်။ အချစ်နဲ့ပတ်သတ်ပြီးအမွှမ်းတင်ရေးဖွဲ့ အဓိပ္ပာယ်အမျိုးမျိုးဖွင့်ကြတဲ့အဌကထာဆရာတွေလည်း ခေတ်အဆက်ဆက်မှာရှိခဲ့တာပါပဲ။ ဒါပေမဲ့တစ်ခါတစ်လေမှာ ဖောက်ပြန်မှုကို ဖူးစာလို့အမည်တပ်ပြီး အချစ်ကိုပုံမှားရိုက်သူတွေလည်းရှိပြန်ပါတယ်။ ဒီလိုဇာတ်ရှုပ်တွေနဲ့နာမည်ကျော်တဲ့ အတွဲကတော့ အိုက်ကာဒီနဲ့ဝမ်ဒါနာရာတို့အာဂျင်တီးနားအတွဲပါပဲ။ ပီအက်စ်ဂျီတိုက်စစ်မှုးတို့စုံတွဲဟာ (၉)နှစ်ကြာပတ်သတ်အပြီးမှာတော့ ဇာတ်လမ်းတခန်းရပ်ခဲ့ပါပြီ။
တကယ်တော့ ဒီစုံတွဲဟာ ခေသူတွေမဟုတ်ပါဘူး။ အချစ်ကျမ်းကြေတယ်ပဲပြောရမလား ဖောက်ပြန်တဲ့နေရာမှာဆရာကျတယ်ပဲပြောရမလား ဘယ်လိုတံဆိပ်ကပ်ရမလဲတောင်မသိပါဘူး။ အိုက်ကာဒီတို့အတွဲဇာတ်လမ်းက စကတည်းကယဉ်တကိုယ်ဆိုသလို ဇာတ်ကရှုပ်ပါတယ်။ အိုက်ကာဒီ ဆမ်ဒိုးရီးယားမှာကစားစဉ် ဝမ်ဒါနာရာဟာအသင်းဖော်မက်စီလိုပက်ဇ်ရဲ့ဇနီးသည်ဖြစ်ပါတယ်။ အိုက်ကာဒီက အသင်းဖော်မက်စီလိုပက်ဇ်အိမ်ကိုအဝင်အထွက်ရှိသလို ဒီစုံတွဲနဲ့ခရီးတွေအတူတူထွက်လေ့ရှိတာပါ။ အနေနီးလို့ စိတ်ယိုင်တာလား ဒီယုန်မြင်လို့ဒီခြုံထွင်တာလား အိုက်ကာဒီပဲသိမှာဖြစ်ပြီး နောက်ဆုံးတော့ အသင်းဖော်မက်စီလိုပက်ဇ်ရဲ့ဇနီးကိုဖြတ်ခုတ်ခဲ့ပါတယ်။ အသင်းဖော်နဲ့ဇနီးသည်ကိုယုံကြည်ခဲ့တဲ့ မက်စီလိုပက်ဇ်တယောက်အဲ့ဒီအချိန်ကအရူးမီးဝိုင်းဘယ်လောက်ဖြစ်မလဲတွေးကြည့်လို့တောင်မရပါဘူး။ ဒါပေမဲ့အိုက်ကာဒီနဲ့ဝမ်ဒါနာရာတို့ကတော့ လူ့စည်းမျဉ်းတွေ လူ့သိက္ခာတွေကိုမျက်ကွယ်ပြုပြီး ဖူးစာဆိုတဲ့စကားလုံးလှလှလေးကိုသုံးကာ သူတို့ရမ္မက်ကြီးတာကိုဖုံးကွယ်ခဲ့ကြတာပါ။ ဝမ်ဒါတစ်ယောက် မက်စီလိုပက်ဇ်နဲ့ရတဲ့ကလေးအပြင် အိုက်ကာဒီနဲ့တွဲတဲ့ (၉)နှစ်တာကာလအတွင်း ကလေး(၂)ယောက်ထပ်ရခဲ့ပါတယ်။ ဒါပေမဲ့ ရမ္မက်တွေနဲ့ဖန်တီးထားတဲ့အိမ်ထောင်ရေးဟာ တသက်လုံးတော့မခံပါဘူး။
အခုတော့ နှစ်ယောက်သားကွာရှင်းပြီး ဝမ်ဒါက အတွဲသစ်နဲ့တောင်ဖြစ်နေပါပြီ။ သူတို့မကွာရှင်းမီ အိုက်ကာဒီကလည်းဖောက်ပြန်ခဲ့ပါသေးတယ်။ ဝမ်ဒါနာရာ အီတလီပြန်စဉ် အိုက်ကာဒီက အာဂျင်တိုင်းမော်ဒယ်တယောက်နဲ့ဖောက်ပြန်ဖို့ကြိုးစားခဲ့တယ်လို့သတင်းထွက်ခဲ့ပါတယ်။ နောက်တော့ပြန်အဆင်ပြေတော့မလိုလိုသတင်းတွေထွက်ခဲ့ပေမယ့် မြွေမြွေချင်းခြေမြင်ဆိုသလို နှစ်ယောက်လုံးကတိုက်ကွက်ဖော်နေကြပါပြီ။ ဒါကြောင့်လည်း ဝမ်ဒါနာရာဟာသူ့ထက် (၁၃)နှစ်ငယ်တဲ့ rapper တယောက်ဖြစ်တဲ့ L’Ganteနဲ့ပေါ်တင်တွဲပြနေပါပြီ။ ချစ်သူသစ်နဲ့အနမ်းခြွေနေပုံကိုဆိုရှယ်မီဒီယာမှာတင်ထားပြီး အချစ်ကဝေကြီးဖြစ်ကြောင်းပြသခဲ့ပါတယ်။
အသင်းဖော်အပေါ် သူငယ်ချင်းအပေါ်သစ္စာဖောက်ခဲ့တဲ့ အိုက်ကာဒီတယောက် ဒီတခါတော့သူ့အလှည့်ရောက်ပြီထင်ပါတယ်။ ex ရဲ့လုပ်ရပ်အပေါ်ရှုတ်ချခဲ့ပြီး ‘သူ့ (ဝမ်ဒါ) အပြုအမူသူ့လုပ်ရပ်တွေက တကမ္ဘာလုံးရဲ့ဟားတိုက်ရယ်စရာဖြစ်နေပါပြီ။ကျွန်တော်ဒါမျိုးအားမပေးချင်သလို ဖုံးကွယ်လည်းမပေးချင်တော့ပါဘူး။ အကာအကွယ်လည်းမပေးချင်ပါဘူး’လို့ပြောခဲ့ပါတယ်။ အခုချိန်မှသာ ဘယ်သူကမှန်တယ် ဘယ်သူကမှားတယ်ပြောနေပေမယ့် တကယ်တော့သူတို့နှစ်ယောက်စတွဲတည်းကမှားနေခဲ့တာဖြစ်ပါတယ်။ လူကျင့်ဝတ်မလိုက်နာခဲ့ကြတဲ့လူနှစ်ယောက်ဟာ သူတို့ရဲ့ရမ္မက်ကြီးမှုကို အချစ်လို့ခေါင်းစဉ်တပ်ခဲ့ကြသူတွေဖြစ်လို့ပါပဲ။
