ဆော်ဒီလိဂ်ရဲ့ငွေကြေးသုံးစွဲမှုတွေဟာ အပြောင်းအရွှေ့ဈေးကွက်ကို ပြောင်းလဲခဲ့ပြီး ထိပ်တန်းကလပ်တွေအနေနဲ့ ဖြစ်ပျက်ခဲ့တဲ့အရာတွေကို သတိထားဖို့လိုအပ်တယ်လို့ မန်စီးတီးအသင်းနည်းပြ ဂွာဒီယိုလာက ပြောခဲ့ပါတယ်။
ဆော်ဒီလိဂ်ဟာ ရော်နယ်ဒိုကို ခေါ်ယူနိုင်ခဲ့ပြီးနောက် နာမည်ကျော်ကစားသမားအများအပြားကို နိုင်ငံအတွင်း ခေါ်ဆောင်နိုင်ဖို့ ကြီးမားစွာဆွဲဆောင်နိုင်ခဲ့တာပါ။မန်စီးတီးတောင်ပံကစားသမား မာရတ်ဇ်နဲ့ နယူးကာဆယ်တောင်ပံကစားသမား စိန့်မက်ဆီမင်တို့ဟာ မကြာသေးခင်က အယ်လ်အာလီအသင်းထံ ပြောင်းရွှေ့ခဲ့တာဖြစ်ပါတယ်။
ဂွာဒီယိုလာက “ဆော်ဒီဟာ ဈေးကွက်ကို ပြောင်းလဲသွားခဲ့ပါတယ်။လွန်ခဲ့တဲ့လအနည်းငယ်က ရော်နယ်ဒိုတစ်ဦးတည်းသွားခဲ့ပါတယ်။ထိပ်တန်းကစားသမားအများအပြားက ဒီလိဂ်မှာသွားရောက်ကစားမယ်လို့ ဘယ်သူကမှထင်ထားမှာမဟုတ်ပါဘူး”
“အနာဂတ်မှာတော့ ကလပ်အသင်းတွေအနေနဲ့ ဒီဖြစ်ပျက်နေတဲ့ အရာတွေကို သတိထားဖို့ လိုအပ်ပါတယ်။မာရတ်ဇ်ဟာ မယုံနိုင်စရာကောင်းတဲ့ ကမ်းလှမ်းမှုကို ရရှိခဲ့ပြီး အဲ့ဒါကြောင့် မသွားနဲ့ဆိုပြီး ပြောလို့မရပါဘူး”လို့ ဆိုခဲ့ပါတယ်။
လက်ရှိအချိန်မှာလည်း ဆော်ဒီလိဂ်ဟာ ဘိုင်ယန်မြူးနစ်ကစားသမား မာနေးအပါအဝင် ထိပ်တန်းကစားသမားအချို့ကို ခေါ်ယူနိုင်ဖို့လည်း ဆက်ပြီးကြိုးပမ်းနေတာဖြစ်ပါတယ်။