စပါးနည်းပြ ကွန်တီက သူ့အနေနဲ့ လက်စတာနဲ့ ဒီကနေ့ည ကစားမယ့် ပရီးမီးယားလိဂ်ပွဲမှာ ဆွန်ဟောင်မင်ကို ချန်လှပ်ဖို့ ပြင်ဆင်ထားကြောင်း ဝန်ခံပြောကြားလိုက်ပါတယ်။ ဆွန်ဟောင်မင်ဟာ ဒီရာသီမှာ ပုံမှန်ခြေစွမ်းပျောက်ဆုံးနေတာပါ။
ပြီးခဲ့တဲ့ရာသီမှာ အဆိုပါ တောင်ကိုရီးယား ကစားသမားလေးက အသင်းအတွက် ခြေစွမ်းပြခဲ့ပြီး ပရီးမီးယားလိဂ် ဂိုးသွင်းဘုရင်ဆုကိုလည်း လီဗာပူးတိုက်စစ်ကစားသမား ဆာလာနဲ့ ပူးတွဲ ဆွတ်ခူးနိုင်ခဲ့ပါတယ်။ ဒါပေမယ့် ဒီရာသီမှာတော့ ဆွန်ဟောင်မင်က အသင်းအတွက် တဂိုးမှ မသွင်းယူနိုင်သေးပါဘူး။
ကွန်တီက “ဆွန်က မပျော်ရွှင်တာ သေချာတာပေါ့။ ဘာကြောင့်လဲဆိုတော့ သူက ဂိုးမှမသွင်းနိုင်တာ။ သူလက်ရှိအနေအထားအတွက် စိတ်ဆိုးနေတာက သာမန်ကိစ္စပါပဲ။ ဘာလို့လဲဆိုတော့ သူကိုယ်တိုင်လည်း ပြောင်းလဲချင်နေလို့လေ”
“ကျနော်တို့ ဆွန်ဟောင်မင်အကြောင်းကို ပြောနေကြပေမယ့် သူက ကျနော်တို့အတွက် တကယ်ကို အရေးပါတဲ့ ကစားသမားပါ။ အချို့ပွဲတွေမှာ သူ ပွဲထွက်ခွင့်မရမှာတော့ သေချာပါတယ်။ ဟယ်ရီကိန်းလည်း အတူတူပါပဲ”
“ဒါပေမယ့် ဒါက ဆွန်ဟောင်မင်ကို ကာကွယ်ပေးဖို့အတွက်၊ အနားပေးဖို့အတွက်၊ သူ့ခွန်အားတွေကို ချွေတာစေဖို့အတွက်၊ ကျနော်တို့အတွက် နိုင်ပွဲတွေရဖို့အတွက်ပါပဲ။ လက်စတာနဲ့ပွဲမှာတော့ ကျနော် သေချာပေါက် အပြောင်းအလဲလုပ်မှာပါ” လို့ ပြောကြားခဲ့ပါတယ်။
ဒါ့အပြင် အသင်းရဲ့ တောင်ပံကစားသမား ကူလူဆက်ဗ်စကီးကလည်း နောက်ဆုံး သုံးပွဲဆက်တိုက် အရန်ခုံထိုင်ခဲ့ရပါတယ်။ ဒီအပေါ်မှာလည်း ကွန်တီက “ကူလူဆက်ဗ်စကီးကို ချန်လှပ်ရတာ လွယ်ကူတဲ့ ဆုံးဖြတ်ချက်မဟုတ်ပါဘူး”
“ဒါပေမယ့် ကျနော် ချမှတ်သမျှ ဆုံးဖြတ်ချက်တိုင်းက အသင်းကောင်းဖို့အတွက်ပဲ အမြဲတမ်းဖြစ်ပါတယ်” လို့ ပြောကြားခဲ့ပါတယ်။ ဒီတပတ်မှာ ပရီးမီးယားလိဂ်ပွဲ (၇) ပွဲသာ ကစားမှာဖြစ်ပြီး စပါးပွဲကလည်း ပုံမှန်အတိုင်း ကစားသွားမှာဖြစ်ပါတယ်။
