လီဗာပူးလ်အသင်းဟာ ဒီမနက်ပိုင်းက ကစားခဲ့တဲ့ ပရီးမီးယားလိဂ်ပွဲစဉ်မှာ မြို့ခံပြိုင်ဘက် အဲဗာတန်အသင်းကို ၂ ဂိုး- ဂိုးမရှိနဲ့ အနိုင်ရရှိသွားခဲ့ပါတယ်။
လီဗာပူးလ်အတွက် ဂိုးတွေကို ဆာလတ်နဲ့ ဂတ်ပိုတို့က သွင်းယူခဲ့ပြီး ဂတ်ပိုအတွက်ကတော့ လီဗာပူးလ်ကစားသမားဘ၀ ပထမဆုံးသွင်းဂိုးကို ရယူနိုင်ခဲ့တာဖြစ်ပါတယ်။ဒီနိုင်ပွဲဟာ လီဗာပူးလ်အသင်းအတွက် ၂၀၂၃ မှာ ပထမဆုံးရတဲ့ နိုင်ပွဲလည်းဖြစ်ခဲ့တာပါ။
ရလဒ်တွေဆိုးနေလို့ ဝေဖန်မှတွေခံနေရတဲ့ လီဗာပူးလ်အသင်းဟာ အဲဗာတန်အသင်းကို အနိုင်ရပြီး နိုင်ပွဲပျောက်ဆုံးနေမှုတွေကို အဆုံးသတ်ခဲ့တာဖြစ်ပါတယ်။လီဗာပူးလ်အသင်းဟာ ဒီနိုင်ပွဲကြောင့် အမှတ်ပေးဇယားအဆင့် ၉ နေရာကို ပြန်တက်လှမ်းနိုင်ခဲ့ပါတယ်။
ဒါပေမယ့် အန်ဖီးကလပ်ဟာ ချန်ပီယံလိဂ်ဝင်ခွင့်ရဖို့ အဆင့် ၄ နေရာမှာရှိနေတဲ့ နယူးကာဆယ်အသင်းနဲ့ ၉ မှတ်ကွာဟနေတာဖြစ်ပါတယ်။အဲ့ဒါကြောင့် လာမယ့်ပွဲစဉ်တွေမှာ ချန်ပီယံလိဂ်ဝင်ခွင့်ရဖို့ အာရုံစိုက်ရတော့မှာဖြစ်ပါတယ်။
လီဗာပူးလ်အသင်းဟာ လာမယ့်ပရီးမီးယားလိဂ်ပွဲအဖြစ် နယူးကာဆယ်အသင်းနဲ့ အဝေးကွင်းမှာ ယှဉ်ပြိုင်ရမှာပါ။ဒီပွဲပြီးရင်တော့ ရီးရယ်လ်အသင်းနဲ့ ချန်ပီယံလိဂ်ယှဉ်ပြိုင်ရမှာဖြစ်ပါတယ်။