ဘရန်ဖိုဒ့်အသင်းနည်းပြ သောမက်စ်ဖရန့်ခ်က အာဆင်နယ်အသင်းကို ၂ ဂိုး-၁ ဂိုးနဲ့ အရေးနိမ့်တဲ့ပွဲမှာ အာဆင်နယ်အသင်းကစားသမား ဟာဗက်ဇ်ကို ထုတ်ပယ်သင့်တယ်လို့ ပြောခဲ့ပါတယ်။
ဒီပွဲမှာ အာဆင်နယ်အသင်းဟာ ဒီကလန်ရိုက်စ်ရဲ့ဂိုးနဲ့ ဦးဆောင်နိုင်ခဲ့ပေမယ့် ရမ်စဒေးလ်ရဲ့အမှားကနေ ဝစ်ဆာက ဘရန်ဖိုဒ့်အသင်းအတွက် ချေပဂိုးကို ပြန်သွင်းယူခဲ့တာပါ။ဒါပေမယ့် ပွဲချိန် ၈၆ မိနစ်မှာ ဟာဗက်ဇ်က အာဆင်နယ်အသင်းအတွက် အနိုင်ဂိုးသွင်းယူပေးခဲ့တာဖြစ်ပါတယ်။ဟာဗက်ဇ်ဟာ ဒီပွဲစဉ်ရဲ့ပထမပိုင်းမှာ အဝါကက်ထိခဲ့ပြီး ဒုတိယပိုင်းဂိုးဧရိယာထဲ ဟန်ဆောင်လှဲချတာကနေ ဒုတိယအဝါကတ်ထိသင့်တယ်လို့ ဘရန်ဖိုဒ့်နည်းပြက ယုံကြည်နေတာပါ။
သောမက်စ်ဖရန့်ခ်က”ဟာဗက်ဇ်က ရှင်းရှင်းလင်းလင်း ဒိုင်ဗင်ထိုးခဲ့တာပါ။ဒါက ဒုတိယအဝါကတ်နဲ့ အနီကတ်ဖြစ်သင့်ပါတယ်။အဲ့ဒါဆိုရင် သူလည်း အနိုင်ဂိုးသွင်းယူနိုင်တော့မှာမဟုတ်ပါဘူး။ဒါဆိုရင် ကျွန်တော်တို့က ပွဲကို အရှိန်မြှင့်ပြီး အနိုင်ရလဒ်တောင်ရယူသွားနိုင်တယ်”လို့ ဆိုခဲ့ပါတယ်။
ကိုင်ဟာဗက်စ်ဟာ အာဆင်နယ်အသင်းအတွက် နောက်ဆုံးကစားခဲ့တဲ့ ပရီးမီးယားလိဂ် ၄ ပွဲမှာ ၄ ဂိုးသွင်းပြီး ၂ ဂိုးဖန်တီးကာ အသင်းအတွက်ခြေစွမ်းပြသနေတာဖြစ်ပါတယ်။အဲ့ဒါကြောင့် နည်းပြ အာတီတာက ပွဲအပြီးမှာ ဟာဗက်ဇ်ကို ချီးကျူးမှုတွေပြုလုပ်သွားခဲ့ပါတယ်။အာဆင်နယ်အသင်းဟာ ဒီပွဲအနိုင်ရခဲ့တာကြောင့် လီဗာပူးလ်နဲ့မန်စီးတီးပွဲမကစားခင် ပရီးမီးယားလိဂ်အမှတ်ပေးဇယားကို ဦးဆောင်နိုင်ခဲ့ပါတယ်။
