ဘာစီလိုနာအသင်းဟာ ဂီတာဖေးအသင်းမှာ ခြေစွမ်းပြသနေတဲ့ ယူနိုက်တက်အသင်းကစားသမား ဂရင်းဝုဒ်ကို ခေါ်ယူဖို့ စိတ်ဝင်စားနေတယ်လို့ ဗြိတိန်မီဒီယာတွေက ဖော်ပြထားပါတယ်။
ဂရင်းဝုဒ်ဟာ စွဲချက်တွေကြောင့် ဘောလုံးလောကနဲ့ တစ်နှစ်နီးပါးကြာဝေးကွာခဲ့ပေမယ့် ပြန်ကစားနိုင်တဲ့အချိန်မှာ ဂီတာဖေးအသင်းနဲ့အတူ ပြန်တောက်ပလာခဲ့တာပါ။ဂရင်းဝုဒ်ဟာ ဂီတာဖေးအသင်းအတွက် ပါဝင်ကစားထားတဲ့ ၁၅ ပွဲမှာ ၅ ဂိုးသွင်းပြီး ၄ ဂိုးဖန်တီးထားတာဖြစ်ပါတယ်။
ဒီလိုစွမ်းဆောင်ရည်တွေကြောင့် ဂရင်းဝုဒ်ကို ခေါ်ယူဖို့ စိတ်ဝင်စားနေတဲ့ အသင်းတွေအများအပြားရှိပြီး ဒီထဲမှာ ထိပ်သီးအသင်းတွေဖြစ်တဲ့ ဘာစီလိုနာနဲ့ ရီးရယ်လ်အသင်းတို့လည်း ပါဝင်လာခဲ့တာပါ။ဘာစီလိုနာအသင်းကတော့ ဂရင်းဝုဒ်အတွက် ပြောင်းရွှေ့ကြေးယူရိုသန်း ၄၀ အပြင် မက်ဆီဝတ်ဆင်ခဲ့တဲ့ ကျောနံပတ် ၁၀ ကိုပါပေးဖို့ ရှိနေတာဖြစ်ပါတယ်။
ဂီတာဖေးအသင်းကလည်း ဂရင်းဝုဒ်ကို အပြီးသတ်ခေါ်ယူနိုင်ဖို့ ယူနိုက်တက်အသင်းနဲ့ ဆွေးနွေးမှုတွေပြုလုပ်ဖို့ ရှိနေတာပါ။ယူနိုက်တက်အသင်းကတော့ ဂရင်းဝုဒ်ကိုခေါ်ယူဖို့ ပြောင်းရွှေ့ကြေးအများအပြားပေးမယ့် အသင်းတွေရဲ့ကမ်းလှမ်းမှုကို လက်ခံသွားဖို့ ရှိနေတာဖြစ်ပါတယ်။
