ဘာစီလိုနာအသင်းဟာ အိမ်ကွင်းမှာ ဗီလာရီးရယ်လ်အသင်းကို ၅ ဂိုး- ၃ ဂိုးနဲ့ အရေးနိမ့်ပြီးနောက် နည်းပြဇာဗီက ဒီရာအကုန်မှာ အသင်းကနေ ထွက်ခွာတော့မယ်လို့ အတည်ပြုလိုက်ပါတယ်။
ဘာစီလိုနာအသင်းဟာ ပြီးခဲ့တဲ့ရက်ပိုင်းတွေက ရီးရယ်လ်အသင်းကို စပိန်စူပါဖလားဗိုလ်လုပွဲမှာ ၄ ဂိုး-၁ ဂိုးနဲ့ အရေးနိမ့်ခဲ့သလို စပိန်ကိုပါဒယ်ရေးဖလားပွဲစဉ်မှာလည်း ဘီလ်ဘာအိုအသင်းကို အချိန်ပိုမှာ ၄ ဂိုး-၂ ဂိုးနဲ့ အရေးနိမ့်ခဲ့တာပါ။အဲ့ဒါကြောင့် ဇာဗီဟာ ဘာစီလိုနာအသင်းနည်းပြရာထူးနဲ့ ပတ်သက်ပြီး ဖိအားတွေခံစားခဲ့ရတာဖြစ်ပါတယ်။
ဇာဗီဟာ ဘာစီလိုနာအသင်းနဲ့ ၂၀၂၅ ခုနှစ်အထိ စာချုပ်ရှိနေပေမယ့် ဗီလာရီးရယ်လ်အသင်းကို အရေးနိမ့်တဲ့ပွဲအပြီးမှာ အသင်းက ထွက်ခွာဖို့ ဆုံးဖြတ်ခဲ့တာပါ။ဘာစီလိုနာအသင်းဟာ ဗီလာရီးရယ်လ်အသင်းကို အရေးနိမ့်ခဲ့တာကြောင့် လာလီဂါထိပ်ဆုံးနေရာမှာ ရှိတဲ့ ရီးရယ်လ်အသင်းနဲ့ ၁၀ မှတ်ကွာဟသွားပြီဖြစ်ပါတယ်။
ဇာဗီက “ဒီရာသီအကုန်ကိုကျော်ပြီး ဘာစီလိုနာအသင်းနည်းပြအဖြစ် ဆက်ရှိမှာမဟုတ်တော့ဘူးလို့ ကြေညာချင်ပါတယ်။လွန်ခဲ့တဲ့ရက်အနည်းငယ်က ထွက်ခွာဖို့ ဆုံးဖြတ်ခဲ့ပြီး ဘာစီလိုနာအသင်းအနေနဲ့ အပြောင်းအလဲတွေပြုလုပ်ဖို့ အချိန်တန်ပါပြီ။ဒီဆုံးဖြတ်ချက်က မှန်ကန်တယ်လို့ထင်ပါတယ်။ဒီကလပ်ကို ကျနော်ချစ်တယ်”လို့ ဆိုခဲ့ပါတယ်။
ဇာဗီဟာ ပြီးခဲ့တဲ့ရာသီက ဘာစီလိုနာအသင်းကို စပိန်လာလီဂါဖလားနဲ့ စပိန်စူပါဖလားရယူပေးခဲ့ပေမယ့် ဒီရာသီမှာ ရလဒ်ဆိုးတွေနဲ့ ကြုံတွေ့နေရတာဖြစ်ပါတယ်။