အာဆင်နယ်အသင်းတောင်ပံကစားသမား ဆာကာက မန်စီးတီးအသင်းဟာ ပြီးပြည့်စုံတဲ့အသင်းမဟုတ်တာကြောင့် ပရီးမီးယားလိဂ်ချန်ပီယံပြိုင်ပွဲမှာ အမှတ်လျော့နိုင်သေးတယ်လို့ ဆိုခဲ့ပါတယ်။
အာဆင်နယ်အသင်းဟာ စပါးအသင်းကို ၃ ဂိုး-၂ ဂိုးနဲ့ အနိုင်ရပြီးနောက် နှစ်ပေါင်း ၂၀ ကျော်ကြာဝေးကွာနေတဲ့ ပရီးမီးယားလိဂ်ဖလားကို ဒီရာသီမှာ ရယူနိုင်ဖို့ ပစ်မှတ်ထားနေတာပါ။ဒါပေမယ့် မန်စီးတီးအသင်းက နော်တင်ဟမ်ဖောရက်စ်အသင်းကို ၂ ဂိုး- ဂိုးမရှိနဲ့ အနိုင်ရခဲ့တာကြောင့် အာဆင်နယ်အသင်းနဲ့ မန်စီးတီးအသင်းတို့ဟာ ရမှတ်ကွာဟမှု ၁ မှတ်သာရှိတော့တာဖြစ်ပါတယ်။ပြီးတော့ မန်စီးတီးအသင်းက ပွဲကျန်ကစားဖို့ ၁ ပွဲကျန်ရှိနေသေးတာပါ။
စပါးအသင်းနဲ့ပွဲမှာ အာဆင်နယ်အသင်းအတွက် တစ်ဂိုးသွင်းယူခဲ့တဲ့ ဆာကာကတော့ ဒီရာသီပရီးမီးယားလိဂ်ပြိုင်ပွဲမပြီးဆုံးခင်မှာ မန်စီးတီးအသင်းခြေချော်နိုင်တယ်လို့ ယုံကြည်နေတာဖြစ်ပါတယ်။
ဆာကာက”မန်စီးတီးက အံ့သြစရာကောင်းတဲ့အသင်းဖြစ်ပေမယ့် သူတို့ဟာ ပြီးပြည့်စုံတဲ့အသင်းမဟုတ်ပါဘူး။ဘယ်အသင်းကမှမပြီးပြည့်စုံတဲ့အတွက် သူတို့အမှတ်တွေလျော့သွားနိုင်ပါတယ်။ကျနော်တို့ကတော့ လက်ကျန်ပွဲတွေမှာ အရာအားလုံးပေးပြီး ကိုယ့်အလုပ်ကိုအကောင်းဆုံးလုပ်သွားမယ်”လို့ ဆိုခဲ့ပါတယ်။