ဘာစီလိုနာအသင်းနည်းပြ ဇာဗီက ဂီတာဖေးအသင်းကို ၄ ဂိုး-ဂိုးမရှိနဲ့ အနိုင်ရခဲ့တဲ့ပွဲအပြီးမှာ သူတို့ဟာ လာလီဂါဆုဖလားအတွက် ဆက်ပြီးတိုက်ပွဲဝင်သွားဦးမယ်လို့ဆိုခဲ့ပါတယ်။
ဘာစီလိုနာအသင်းဟာ နောက်ပိုင်းကစားခဲ့တဲ့ လာလီဂါပွဲတွေမှာ ရလဒ်ကောင်းတွေဆက်တိုက်ရရှိနေခဲ့ပြီး ဂီတာဖေးအသင်းကို အနိုင်ရခဲ့တာကြောင့် လာလီဂါအဆင့် ၂ နေရာကိုတက်နိုင်ခဲ့ပြီး အဆင့် ၁ နေရာက ရီးရယ်လ်အသင်းနဲ့ ၅ မှတ်ကွာဟနေတာပါ။ဒါပေမယ့် ရီးရယ်လ်နဲ့ ဂျီရိုနာအသင်းတို့ဟာ ပွဲမကစားရသေးတာကြောင့် ရမှတ်ကွာဟမှုနဲ့ အဆင့်ရပ်တည်မှုတွေဟာ အပြောင်းအလဲတွေဖြစ်သွားနိုင်သေးပါတယ်။
ဇာဗီကတော့ သူတို့ဟာ အမှတ်ပေးချန်ပီယံဆုအတွက်ဆက်ပြီးတိုက်ပွဲဝင်သွားမှာဖြစ်သလို ထိပ်ပိုင်းအသင်းတွေကို ဆက်ပြီးဖိအားပေးနိုင်ဖို့အတွက် ဒီလိုစွမ်းဆောင်ရည်မျိုးတွေလိုအပ်တယ်လို့ ဆိုခဲ့ပါတယ်။
ဇာဗီက”ကျနော်တို့ဆုဖလားအတွက် အရှုံးမပေးပါဘူး။အပတ်တိုင်းအနိုင်ရဖို့လိုအပ်ဆိုတာ ကျနော်တို့သိပါတယ်။အခု ကျနော်တို့ရှေ့တစ်လှမ်းတိုးပြီးဖြစ်တဲ့အတွက် ချန်ပီယံဆုအတွက် တိုက်ပွဲဝင်နိုင်ဖို့ အခွင့်အရေးရှိပါတယ်။ကျနော်တို့ဟာ ပုံစံကောင်းတွေရရှိနေပါတယ်”
“သင်္ချာနည်းအရ အခွင့်အရေးမရှိရင်တောင် ကျနော်တို့ ရီးရယ်လ်နဲ့ ဂျီရိုနာကို ဖိအားပေးနိုင်ဖို့ ကြိုးစားသွားမှာပါ။ဒီပွဲမှာလုပ်ခဲ့သလိုပဲ အနိုင်ရဖို့ ကျနော်တို့ အာရုံစိုက်သွားမှာပါ။လာလီဂါနဲ့ ချန်ပီယံလိဂ်မှာ ကျနော်တို့အတွက် အချိန်ရှိနေပါသေးတယ်”လို့ ဆိုခဲ့တာဖြစ်ပါတယ်။
ဒါ့အပြင် ဇာဗီက ဘာစီလိုနာအသင်းနည်းပြရာထူးကနေ ထွက်ခွာမယ့်ဆုံးဖြတ်ချက်ကို နောင်တမရဘူးလို့လည်း ဆိုခဲ့တာဖြစ်ပါတယ်။