ဘာစီလိုနာအသင်းဟာ ဘီလ်ဘာအိုအသင်းကို အချိန်ပိုမှာ အရေးနိမ့်ပြီး ကိုပါဒယ်ရေးဖလားပြိုင်ပွဲကနေ ထွက်ခွာခဲ့ရပေမယ့် အသင်းရဲ့အနာဂတ်က တောက်ပနေတယ်လို့ ဆိုခဲ့ပါတယ်။
ဘာစီလိုနာအသင်းဟာ ဒီရာသီမှာ ယာမဲလ်အပါအဝင် ဆယ်ကျော်သက်ကစားသမားအချို့ကို အသင်းအတွက် အသုံးပြုနေတာဖြစ်ပြီး နည်းပြ ဇာဗီက ဒီကစားသမားတွေအပေါ် ယုံကြည်မှုရှိနေတာဖြစ်ပါတယ်။ဇာဗီဟာ လာမာစီယာအကယ်ဒမီက ထွက်ပေါ်လာတဲ့ ကစားသမားဖြစ်တာကြောင့် ဒီအကယ်ဒမီက ကစားသမားတွေအပေါ် အလွန်မျှော်လင့်နေတာပါ။
ဇာဗီက “ကျနော့်ကို ယုံကြည်ပါ။ဘာစီလိုနာက အလွန်ကောင်းမွန်တဲ့ အနာဂတ်ရှိနေပါတယ်။ကျနော့်အကြောင်းကို ပြောနေတာမဟုတ်ဘဲ လူငယ်ကစားသမားတွေအကြောင်းကို ပြောနေတာပါ။ဒါကြောင့်လည်း သူတို့ကို ကျနော်အသုံးပြုနေတာဖြစ်ပြီး သူတို့အနာဂတ်အတွက် တကယ်ကိုအဆင်သင့်ဖြစ်စေချင်နေတာပါ။ကျနော်ဒီမှာရှိရှိ၊မရှိရှိ ဒီကောင်လေးတွေက ထူးခြားပါတယ်”လို့ ဆိုခဲ့ပါတယ်။
ဘာစီလိုနာအသင်းဟာ ဒီရာသီမှာ ရလဒ်တွေမကောင်းဖြစ်နေတာကြောင့် နည်းပြ ဇာဗီအပေါ်မှာ ဖိအားတွေကျရောက်နေပေမယ့် သူကတော့ အကောင်းဆုံးလုပ်ဆောင်ပြီး ကျန်ရှိနေတဲ့ လာလီဂါနဲ့ ချန်ပီယံလိဂ်ပြိုင်ပွဲမှာ ချန်ပီယံဆုစိန်ခေါ်နိုင်အောင် ကြိုးစားသွားမယ်လို့ ပြောခဲ့ပါတယ်။
