ရီးရယ်လ်အသင်းဟာ ဒီမနက်ကစားခဲ့တဲ့ စပိန်လာလီဂါပွဲစဉ်မှာ အလာဗတ်စ်အသင်းကို ၁ ဂိုး- ဂိုးမရှိနဲ့ အနိုင်ရရှိသွားခဲ့ပြီး ၂၀၂၃ ခုနှစ်ကို အဆင့် ၁ နေရာနဲ့ နှုတ်ဆက်ခဲ့တာဖြစ်ပါတယ်။
ဒီပွဲစဉ်ရဲ့ပွဲချိန် ၅၄ မိနစ်မှာ နာချိုအနီကတ်နဲ့ ထုတ်ပယ်ခံခဲ့ရတာကြောင့် ရီးရယ်လ်အသင်း ၁၀ ဦးတည်းနဲ့ ကစားခဲ့ရပေမယ့် ပွဲချိန် ၉၂ မိနစ်မှာ ဗတ်စ်ကွက်စ်က ရီးရယ်လ်အသင်းအတွက် အဖိုးတန်အနိုင်ဂိုးကို သွင်းယူပေးခဲ့တာပါ။ရီးရယ်လ်အသင်းဟာ ဒီပွဲအနိုင်ရခဲ့ချိန်မှာ ဂျီရိုနာအသင်းက ဘက်တစ်အသင်းနဲ့ သရေကျသွားခဲ့တာဖြစ်ပါတယ်။
အဲ့ဒါကြောင့် ရီးရယ်လ်အသင်းဟာ ဂျီရိုနာအသင်းကို ရမှတ်တူ ဂိုးကွာခြားချက်အသာနဲ့ စပိန်လာလီဂါအမှတ်ပေးဇယားကို ဦးဆောင်လိုက်ပြီး ရာသီဝက်ချန်ပီယံဖြစ်ခဲ့ပါတယ်။စပိန်လာလီဂါ ၁၈ ပွဲကစားအပြီးမှာ ရီးရယ်လ်က အဆင့် ၁၊ ဂျီရိုနာက အဆင့် ၂ ၊ ဘာစီလိုနာအသင်းက ၇ မှတ်အကွာအဆင့် ၃ နဲ့ အသလက်တီကိုအသင်းက အဆင့် ၄ နေရာမှာ ရပ်တည်နေတာပါ။
စပိန်လာလီဂါပွဲစဉ်တွေကို ဇန်နဝါရီပထမအပတ်မှာ ပြန်လည်ယှဉ်ပြိုင်သွားမှာဖြစ်ပါတယ်။