တိုက်စစ်မှူး ဂရင်းဝုဒ်ဟာ ဂီတာဖေးအသင်းက ဆီဗီလာအသင်းကို ၃ ဂိုး- ဂိုးမရှိနဲ့ အနိုင်ရတဲ့ပွဲမှာ ခြေစွမ်းပြပြီး ယူနိုက်တက်အသင်းပရိသတ်တွေကို လွမ်းဆွတ်စေခဲ့တာဖြစ်ပါတယ်။
ယူနိုက်တက်အသင်းကနေ အငှားနဲ့လာရောက်ကစားနေတဲ့ ဂရင်းဝုဒ်ဟာ ဒီပွဲမှာ ၁ ဂိုးသွင်းပြီး ၁ ဂိုးဖန်တီးနိုင်ခဲ့တာပါ။ဂရင်းဝုဒ်ဟာ ဂီတာဖေးအသင်းကို ရောက်ရှိလာကတည်းက ပြသခဲ့တဲ့ ခြေစွမ်းတွေကြောင့် အသင်းပရိသတ်တွေရဲ့အချစ်တော်ကစားသမားလည်း ဖြစ်လာခဲ့တာဖြစ်ပါတယ်။
အသက် ၂၂ နှစ်အရွယ်ရှိ ဂရင်းဝုဒ်ဟာ ဂီတာဖေးအသင်းအတွက် ၁၄ ပွဲပါဝင်ကစားအပြီးမှာ ၅ ဂိုးသွင်းယူကာ ၄ ဂိုးဖန်တီးထားတာပါ။ဂရင်းဝုဒ်ရဲ့ခြေစွမ်းတွေကြောင့် ဂီတာဖေးအသင်းက သူ့ကို အပြီးသတ်ခေါ်ယူဖို့ လုပ်ဆောင်နေသလို ဘာစီလိုနာ၊ ဘိုင်ယန်မြူးနစ်အသင်းတို့ရဲ့စောင့်ကြည့်ခြင်းကိုခံနေရတာလည်းဖြစ်ပါတယ်။
ဂီတာဖေးအသင်းဟာ ဆီဗီလာအသင်းကို အနိုင်ရခဲ့တာကြောင့် လာလီဂါအမှတ်ပေးဇယားအဆင့် ၈ နေရာမှာ ရပ်တည်နေတာဖြစ်ပါတယ်။