ရီးရယ်လ်အသင်းက ဘာစီလိုနာအသင်းကို ၄ ဂိုး- ၁ ဂိုးနဲ့ ဂိုးပြတ်အနိုင်ရခဲ့တဲ့ စပိန်ကိုပါဒယ်ရေးဖလား ဗိုလ်လုပွဲမှာ ခြေစွမ်းပြသနိုင်ခဲ့တဲ့ ဗီနီစီးယက်စ်က ဒီပွဲမှာ အဖွင့်ဂိုးသွင်းယူပြီးနောက် ရော်နယ်ဒိုရဲ့နာမည်ကျော်အောင်ပွဲခံဟန် ‘SIU’ ပြုလုပ်ပြီးအောင်ပွဲခံသွားခဲ့တာဖြစ်ပါတယ်။
ဗီနီစီးယက်စ်ဟာ ဒီပွဲမှာ ဘာစီလိုနာအသင်းဘက်ကို ပထမပိုင်းမှာကတည်းက ဟက်ထရစ်ဂိုးသွင်းယူနိုင်ခဲ့တာပါ။ဆော်ဒီကလပ် အယ်လ်နာဆာအသင်းရဲ့အိမ်ကွင်းမှာ ကစားခဲ့တဲ့ ဗိုလ်လုပွဲမှာ ဗီနီစီးယက်စ်ဟာ ပွဲချိန် ၇ မိနစ်မှာ ဂိုးသွင်းယူပြီးနောက် ရော်နယ်ဒိုရဲ့အောင်ပွဲခံဟန်ကို ပြုလုပ်သွားခဲ့တာဖြစ်ပါတယ်။
ဒါနဲ့ ပတ်သက်ပြီး ဗီနီစီးယက်စ်က”ဒီအောင်ပွဲခံမှုက ရော်နယ်ဒိုကို ရည်ရွယ်ပြီး ပြုလုပ်တာပါ။ဘာကြောင့်လဲဆိုရင် ရော်နယ်ဒိုက ကျနော့်ရဲ့အိုင်ဒေါဖြစ်ပြီး လက်ရှိဒီမှာ ကစားနေလို့ပါ”လို့ ဆိုခဲ့ပါတယ်။
ဒဏ်ရာတွေကြောင့် မကြာခဏအနားယူနေရတဲ့ ဗီနီစီးယက်စ်ဟာ ဒီရာသီမှာ ရီးရယ်လ်အသင်းအတွက် ၁၆ ပွဲကစားထားပြီး ၉ ဂိုးသွင်းယူထားတာဖြစ်ပါတယ်။