ဘီလ်ဘာအိုနဲ့ ဘာစီလိုနာအသင်းတို့ဂိုးမရှိသရေကျခဲ့တဲ့ လာလီဂါပွဲစဉ်ရဲ့ပထမပိုင်းမှာ ပီဒရီနဲ့ ဒီဂျောင်တို့ဟာ ဒဏ်ရာရရှိသွားခဲ့တာကြောင့် ဘာစီလိုနာအသင်းဟာ ကွင်းလယ်မှာ ဒဏ်ရာအကျပ်အတည်းတွေနဲ့ ရင်ဆိုင်နေရတာဖြစ်ပါတယ်။
သူတို့၂ ဦးဟာ ဒီရာသီမှာ ဒဏ်ရာတွေနဲ့ ရုန်းကန်နေရပြီး ဘီလ်ဘာအိုအသင်းနဲ့ပွဲမှာ ဒဏ်ရာထပ်ရသွားခဲ့လို့ ပထမပိုင်းအတွင်းမှာပဲ လူစားလဲခဲ့ရတာပါ။ဘာစီလိုနာအသင်းဟာ ချန်ပီယံလိဂ်အဆုံးအဖြတ်ပွဲတွေအပြင် လာလီဂါမှာရလဒ်ကောင်းတွေရရှိဖို့ အားထုတ်ကြိုးပမ်းနေတဲ့အချိန်မှာ ပီဒရီနဲ့ ဒီဂျောင်တို့ရဲ့ဒဏ်ရာဟာ ဘာစီလိုနာအသင်းအတွက် စိတ်ပျက်စရာဖြစ်ခဲ့ရပါတယ်။
ဇာဗီက”ပီဒရီနဲ့ ဒီဂျောင်တို့ရဲ့ဒဏ်ရာတွေကိုကြည့်ရတာမကောင်းပါဘူး။ကံမကောင်းပါဘူး၊ ပြင်းထန်ပုံရပါတယ်။သူတို့အနည်းငယ်အနားယူရမှာဖြစ်လို့ ကျနော်တို့အတွက် စိတ်ပျက်စရာပါပဲ။သူတို့အကြာကြီးအနားမယူရဖို့ မျှော်လင့်တယ်”လို့ ဆိုခဲ့ပါတယ်။
ဘာစီလိုနာအသင်းဟာ ဒီဂျောင်နဲ့ ပီဒရီတို့မတိုင်ခင် ဂါဗီ၊အလွန်ဆို၊ဘယ်လ်ဒီနဲ့ ဖာရန်တောရက်စ်တို့ကိုလည်း ဒဏ်ရာကြောင့် အနားပေးထားရတာဖြစ်ပါတယ်။ဘာစီလိုနာအသင်းဟာ ဘီလ်ဘာအိုအသင်းနဲ့ပွဲမှာ သရေကျခဲ့တာကြောင့် စပိန်လာလီဂါအဆင့် ၃ နေရာမှာဆက်လက်ရပ်တည်နေပြီး အဆင့်၂ နေရာက ဂျီရိုနာအသင်းနဲ့ ၁ မှတ်၊ အဆင့် ၁ နေရာက ရီးရယ်လ်အသင်းနဲ့ ၈ မှတ်ကွာဟနေတာဖြစ်ပါတယ်။