တိုက်စစ်မှူး ဘန်ဇီမာဟာ ဆော်ဒီကလပ် အယ်လ်အီးတီဟတ်အသင်းထံ ပြောင်းတော့မယ်လို့ ရီးရယ်လ်အသင်းကို ပြောခဲ့ကြောင်း သတင်းတွေထွက်ပေါ်လာခဲ့ပါတယ်။
ဆော်ဒီကလပ် အယ်လ်အီးတီဟတ်အသင်းဟာ ဘန်ဇီမာကို ယူရိုသန်း ၄၀၀ နဲ့ ၂ နှစ်စာချုပ်ချုပ်ဆိုဖို့ ကမ်းလှမ်းထားတာဖြစ်ပြီး ကစားသမားကတော့ ဒါကို လက်ခံဖို့ရှိနေတာပါ။အဲ့ဒါကြောင့်လည်း ဘန်ဇီမာဟာ အခုရာသီအကုန်မှာ စာချုပ်သစ်မချုပ်ဆိုတော့ဘူးလို့ ရီးရယ်လ်အသင်းကို ပြောခဲ့ကြောင်း သတင်းတွေက ဖော်ပြခဲ့ပါတယ်။
ဘန်ဇီမာဟာ ရီးရယ်လ်အသင်းနဲ့ ဆုဖလားအောင်မြင်မှုအများအပြား ရရှိခဲ့လို့ ကစားသမားဘ၀ အနားယူဖို့ နီးကပ်လာချိန်မှာ ငွေကြေးအများအပြားရမယ့် ကမ်းလှမ်းမှုကို စိတ်ဝင်စားခဲ့တာပါ။ဆော်ဒီရဲ့ကမ်းလှမ်းမှုမှာ ၂၀၃၀ ကမ္ဘာ့ဖလားအတွက် အိမ်ရှင်အဖြစ်ပြုလုပ်နိုင်အောင် ဘန်ဇီမာက သံတမန်အဖြစ် ဆောင်ရွက်ရမှာလည်း ပါဝင်တာဖြစ်ပါတယ်။
ဆော်ဒီနိုင်ငံဟာ ရော်နယ်ဒိုကို ခေါ်ယူပြီးနောက် နာမည်ကြီးကစားသမားအများအပြားကို ထပ်မံခေါ်ယူနိုင်ဖို့ လုပ်ဆောင်နေပြီး ဘန်ဇီမာအပြင် မက်ဆီကိုလည်း ကြိုးပမ်းနေတာပါ။မက်ဆီဟာ ပီအက်စ်ဂျီအသင်းနဲ့ စာချုပ်ချုပ်မှာ မဟုတ်တဲ့အတွက် အယ်လ်ဟီလယ်အသင်းက ငွေကြေးအများအပြားနဲ့ ကမ်းလှမ်းဖို့ ရှိနေတာ ဖြစ်ပါတယ်။
ဘန်ဇီမာဟာ ဒီရာသီမှာ ရီးရယ်လ်အသင်းနဲ့အတူ ကိုပါဒယ်ရေးဖလား အောင်မြင်မှုကို ရရှိထားခဲ့တာလည်း ဖြစ်ပါတယ်။