မာဆေးလ်အသင်းတိုက်စစ်မှူး အူဘာမီယန်းဟာ မာဆေးလ်အသင်းက ရှက်တာဒိုးနက်အသင်းကို ၃ ဂိုး-၁ ဂိုးနဲ့ အနိုင်ရတဲ့ပွဲမှာ ဂိုးသွင်းယူပြီးနောက် ယူရိုပါလိဂ်ပြိုင်ပွဲရဲ့ဂိုးသွင်းဘုရင်ဖြစ်လာခဲ့ပါတယ်။
ပြီးခဲ့တဲ့အပတ်က ဖယ်လ်ကာအိုနဲ့ ဂိုး ၃၀ ချင်းစီတူညီခဲ့တဲ့ အူဘာမီယန်းဟာ ရှက်တာဒိုးနက်အသင်းနဲ့ပွဲမှာ ၁ ဂိုးသွင်းယူနိုင်ခဲ့တာကြောင့် သွင်းဂိုး ၃၁ ဂိုးနဲ့ ယူရိုပါလိဂ်ပြိုင်ပွဲမှာ သွင်းဂိုးအများဆုံးကစားသမားအဖြစ် စံချိန်တင်နိုင်ခဲ့ပါတယ်။အူဘာမီယန်းဟာ အာဆင်နယ်၊ဒေါ့မွန်၊ဘာစီလိုနာနဲ့ လက်ရှိ မာဆေးလ်အသင်းတွေအတွက် ယူရိုပါလိဂ်ပြိုင်ပွဲမှာ သွင်းဂိုးတွေသွင်းယူခဲ့တာပါ။
အူဘာမီယန်းဟာ အာဆင်နယ်အသင်းအတွက် ၁၄ ဂိုး၊ ဒေါ့မွန်အသင်းအတွက် ၈ ဂိုး၊ ဘာစီလိုနာအသင်းအတွက် ၂ ဂိုးနဲ့ လက်ရှိ မာဆေးလ်အသင်းအတွက် ၇ ဂိုးသွင်းယူထားတာဖြစ်ပါတယ်။ပြီးခဲ့တဲ့နွေရာသီက ချယ်လ်ဆီးအသင်းကနေ ထွက်ခွာခဲ့တဲ့ အူဘာမီယန်းဟာ ဒီရာသီမှာ မာဆေးလ်အသင်းအတွက် ၃၃ ပွဲပါဝင်ကစားထားပြီး ၁၆ ဂိုးသွင်းယူထားတာပါ။
မာဆေးလ်အသင်းဟာ ဒီရာသီလီဂူးဝမ်းပြိုင်ပွဲမှာ အဆင့် ၉ နေရာရပ်တည်နေပြီး ယူရိုပါလိဂ်ပြိုင်ပွဲမှာ ၁၆ သင်းအဆင့်ကို တက်ရောက်နေပြီဖြစ်ပါတယ်။