လီဗာပူးလ်အသင်းနည်းပြ ကလောပ့်က LASK အသင်းကို ၃ ဂိုး- ၁ ဂိုးနဲ့ အနိုင်ရခဲ့တဲ့ ယူရိုပါလိဂ်ပွဲစဉ်အပြီးမှာ အသင်းအတွက် ဒီပြိုင်ပွဲဟာ လွယ်ကူမှာမဟုတ်ဘူးလို့ သတိပေးလိုက်ပါတယ်။
လီဗာပူးလ်အသင်းဟာ ဒီပွဲမှာ ပြီးခဲ့တဲ့ဝုလ်ဗ်စ်အသင်းနဲ့ပွဲက လူစာရင်းကို တစ်သင်းလုံးပြောင်းပြီး ပွဲထွက်လာခဲ့တာကြောင့် LASK အသင်းရဲ့ဦးဆောင်ဂိုးသွင်းယူခြင်းကို ခံခဲ့ရတာပါ။ဒါပေမယ့် ဒါဝင်နူနက်ဇ်၊ ဒီယက်ဇ်နဲ့ ဆာလက်တို့က ချေပဂိုးနဲ့အနိုင်ဂိုးတွေကို ဒုတိယပိုင်းမှာ သွင်းယူခဲ့လို့ လီဗာပူးလ်အသင်းဟာ ဂိုးပြတ်အနိုင်ရရှိခဲ့တာဖြစ်ပါတယ်။
ဒီပွဲဟာ ကလောပ့်အတွက် လီဗာပူးလ်နည်းပြဘ၀ ဥရောပပွဲ ၅၀ မြောက်နိုင်ပွဲဖြစ်ပြီး လီဗာပူးလ်အသင်းကို ကိုင်တွယ်ခဲ့တဲ့ အခြားနည်းပြတွေထက် သာလွန်ခဲ့တယ်လို့သိရပါတယ်။ဒါပေမယ့် ကလောပ့်ကတော့ လီဗာပူးလ်အသင်းအနေနဲ့ ယူရိုပါလိဂ်ပြိုင်ပွဲကို အလွယ်တကူမကျော်ဖြတ်နိုင်ဘူးလို့ ပြောသွားခဲ့တာပါ။
ကလော့ပ်က “လူတွေက လီဗာပူးလ်ဟာ ဒီပြိုင်ပွဲကို အလွယ်တကူကျော်ဖြတ်နိုင်မယ်ဆိုပြီး မျှော်လင့်နေကြတာသိပါတယ်။ဒါပေမယ့် ဒါက ဖြစ်လာဖို့ မရှိပါဘူး။ အုပ်စုမှာရော၊ရှုံးထွက်အဆင့်တွေမှာပါ ဒါကဖြစ်လာစရာမရှိပါဘူး”လို့ ပြောသွားခဲ့တာဖြစ်ပါတယ်။
ယူရိုပါလိဂ်ပြိုင်ပွဲမှာ ဗိုလ်စွဲဖို့ ရေပန်းအစားဆုံးအသင်းဖြစ်နေတဲ့ လီဗာပူးလ်အသင်းဟာ တနင်္ဂနွေနေ့မှာ ဝက်စ်ဟမ်းအသင်းနဲ့ ပရီးမီးယားလိဂ်ပွဲစဉ်ယှဉ်ပြိုင်ရမှာဖြစ်ပါတယ်။
