ယူနိုက်တက်အသင်းက ရှရစ်ဖ်အသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ ယူရိုပါလိဂ်ပွဲစဉ်မှာ ဆန်ချိုဟာ ဂိုးသွင်းအပြီးမှာ သူ့ပုံပါတဲ့ Shin pads ထုတ်ပြကာ အောင်ပွဲခံသွားခဲ့တာဖြစ်ပါတယ်။
ယူနိုက်တက်အတွက် ဒုတိယဂိုးကို ရော််နယ်ဒိုက ပင်နယ်တီကနေ သွင်းယူခဲ့တာပါ။ယူနိုက်တက်အသင်းဟာ ပထမပွဲမှာ ဆိုစီဒက်အသင်းကို အရေးနိမ့်ခဲ့တာကြောင့် ဒီနိုင်ပွဲဟာ ဒီရာသီ ယူနိုက်တက်အသင်းအတွက် ပထမဆုံးနိုင်ပွဲလည်း ဖြစ်ခဲ့ပါတယ်။
ဆန်ချိုကတော့ သူဘာကြောင့် ဒီလို Shin pads ထုတ်ပြပြီးအောင်ပွဲခံခဲလဲဆိုတာကို ပွဲအပြီးမှာ ရှင်းပြသွားခဲ့တာပါ။လူငယ်ပရိသတ်လေးတစ်ဦးက ဆန်ချိုကို Shin pads ပေးခဲ့တာဖြစ်ပါတယ်။
ဆန်ချိုက “သူက ကျွန်တော့်ကို ဒါကို ဝတ်ဆင်စေချင်ခဲ့ပါတယ်။ကျွန်တော်ကလည်း ရတယ်၊ ပြဿနာမရှိဘူးလို့ ပြန်ပြောလိုက်တယ်။အဲ့ဒါကြောင့် သူပေးခဲ့တဲ့ Shin pads ကို ကျွန်တော်ဝတ်ဆင်ခဲ့တယ်ဆိုတာကို ပြသခဲ့တာပါ”လို့ ပြောခဲ့ပါတယ်။
ဆန်ချိုဟာ ဒီရာသီ ယူနိုက်တက်အတွက် ခြေစွမ်းပြသနေပြီး ဒီဂိုးအပါအဝင် ၃ ဂိုးသွင်းယူထားပေမယ့် အဂ်လန်လူစာရင်းမှာတော့ ချန်လှပ်ခံထားရတာ ဖြစ်ပါတယ်။
