ကိုမိုအသင်းဟာ ဒီရာသီ စီးရီးဘီနောက်ဆုံးပွဲစဉ်မှာ ကိုစန်ဇာအသင်းနဲ့ ၁ ဂိုးစီသရေကျခဲ့ပြီးနောက် စီးရီးအေပြိုင်ပွဲဆီကို တန်းတက်ဖို့ ၂၁ နှစ်ကြာစောင့်ဆိုင်းခဲ့ရတာကို အဆုံးသတ်နိုင်ခဲ့ပြီဖြစ်ပါတယ်။
![](https://www.ballpwel.com/wp-content/uploads/2024/05/438163189_1181536092810084_8183403565623932828_n-819x1024.jpg)
အဆင့် ၃ နေရာက ဗီနီစီယာအသင်းဟာ တန်းဆင်းဇုန်အန္တရာယ်ရှိနေတဲ့ စပီဇီယာအသင်းကို အရေးနိမ့်ခဲ့တာကြောင့် ကိုမိုအသင်းဟာ စီးရီးဘီအမှတ်ပေးဇယားအဆင့် ၂ နေရာမှာရပ်တည်ပြီး လာမယ့်ရာသီ စီးရီးအေပြိုင်ပွဲကို တိုက်ရိုက်တန်းတက်ခွင့်ရခဲ့ပြီဖြစ်ပါတယ်။ကိုမိုအသင်းဟာ ၂၀၀၃ က စီးရီးအေကနေ တန်းဆင်းပြီးနောက်ပိုင်းမှာ ဒေဝါလီခံခဲ့ရလို့ စီးရီးဒီကို တန်းဆင်းယှဉ်ပြိုင်ခဲ့ရတာပါ။
ကိုမိုအသင်းဟာ ၂၀၁၅ မှာ စီးရီးဘီကို ပြန်ရောက်လာခဲ့ပေမယ့် နောက်ထပ်တစ်ကြိမ်ဒေဝါလီခံခဲ့ရလို့ ၂၀၁၇-၁၈ ရာသီမှာ စီးရီးဒီပြိုင်ပွဲပြန်ရောက်သွားခဲ့ပါတယ်။အခုအချိန်မှာတော့ ကိုမိုအသင်းဟာ အီတလီထိပ်တန်းလိဂ်ဖြစ်တဲ့ စီးရီးအေပြိုင်ပွဲကို ပြန်လည်ယှဉ်ပြိုင်ရတော့မှာပါ။ကိုမိုအသင်းနဲ့အတူ လာမယ့်ရာသီ စီးရီးအေပြိုင်ပွဲကို ချန်ပီယံဖြစ်ခဲ့တဲ့ ပါးမားအသင်းလည်း တန်းတက်ခွင့်ရရှိခဲ့ပါတယ်။
![](https://www.ballpwel.com/wp-content/uploads/2024/05/438168847_1181536082810085_1746650362297881360_n-819x1024.jpg)
စီးရီးအေတန်းတက်ခွင့် လက်ကျန် ၁ နေရာအတွက်ကိုတော့ အဆင့် ၃ ကနေ အဆင့် ၈ အတွင်းရပ်တည်ခဲ့တဲ့ အသင်းတွေ ပလေးအောဖ့်ယှဉ်ပြိုင်ရမှာဖြစ်ပါတယ်။