ယူကရိန်းဂိုးသမား လူနင်ဟာ ရီးရယ်လ်မက်ဒရစ်အသင်းက လိုက်ပ်ဇစ်အသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ ချန်ပီယံလိဂ် ၁၆ သင်းအဆင့် ပထမအကျော့ပွဲစဉ်မှာ ရီးရယ်လ်အသင်းအတွက် ဂိုးပေါက်ကာကွယ်မှု ၉ ကြိမ်အထိ ပြုလုပ်ပေးခဲ့တာဖြစ်ပါတယ်။
ကစားသမားဘဝပထမဆုံးချန်ပီယံလိဂ်ရှုံးထွက်အဆင့်ပွဲစဉ်ကို ပါဝင်ယှဉ်ပြိုင်ခဲ့ရတဲ့ လူနင်ဟာ ရီးရယ်လ်အသင်းရဲ့ဂိုးပေါက်ကို အကောင်းဆုံးကာကွယ်ပေးခဲ့ပြီး Clean Sheet နဲ့အတူ အရေးပါတဲ့ နိုင်ပွဲရရှိအောင် စွမ်းဆောင်ပေးနိုင်ခဲ့တာပါ။ရီးရယ်လ်အသင်းဟာ အဓိကဂိုးသမား ကော့တွိုက်စ်ဒဏ်ရာကြောင့် အနားယူနေရချိန်မှာ ချယ်လ်ဆီးအသင်းဂိုးသမား ကီပါကို အငှားနဲ့ ခေါ်ယူခဲ့တာဖြစ်ပါတယ်။
ဒါပေမယ့် ကီပါဟာ အမှားအယွင်းပြုလုပ်နေပြီး လူနင်က အကောင်းဆုံးပုံစံတွေရနေတာကြောင့် ရီးရယ်လ်အသင်းနည်းပြ အန်ဆယ်လော့တီဟာ အရေးကြီးတဲ့ပွဲတွေမှာ လူနင်ကို ပွဲထွက်ဂိုးသမားအဖြစ် အသုံးပြုနေတာပါ။လူနင်ကလည်း နည်းပြရဲ့ယုံကြည်မှုကို မပျက်စေအောင် ပါဝင်တဲ့ပွဲတိုင်း လက်စွမ်းပြသနေတာဖြစ်ပါတယ်။
လူနင်ဟာ ဒီရာသီမှာ ရီးရယ်လ်အသင်းအတွက် ၁၇ ပွဲပါဝင်ကစားထားပြီး ၈ ပွဲဂိုးမပေးရအောင် စွမ်းဆောင်ထားတာဖြစ်ပါတယ်။
