ယူနိုက်တက်အသင်းနည်းပြ အဲရစ်တန်ဟတ်က ဘိုင်ယန်မြူးနစ်အသင်းကို ၁ ဂိုး- ဂိုးမရှိနဲ့ အရေးနိမ့်ပြီး ချန်ပီယံလိဂ်ပြိုင်ပွဲကနေ ထွက်ခွာခဲ့ရပေမယ့် ဒီပြိုင်ပွဲဆီပြန်လာချင်တယ်လို့ ဆိုလိုက်ပါတယ်။
ယူနိုက်တက်အသင်းဟာ ချန်ပီယံလိဂ် ၆ ပွဲကစားအပြီးမှာ နိုင်ပွဲ ၁ ပွဲသာရရှိခဲ့ပြီး ပေးဂိုး ၁၅ ဂိုးနဲ့ အဆိုးရွားဆုံးစံချိန်မှတ်တမ်းတွေကိုပိုင်ဆိုင်ခဲ့တာပါ။ယူနိုက်တက်အသင်းဟာ ယူရိုပါလိဂ်တောင် ယှဉ်ပြိုင်ခွင့်မရခဲ့တာကြောင့် လာမယ့်ရာသီ ချန်ပီယံလိဂ်ပြိုင်ပွဲပြန်လည်ယှဉ်ပြိုင်ခွင့်ရဖို့အတွက် ပရီးမီးယားလိဂ်ကို အာရုံစူးစိုက်ရတော့မှာဖြစ်ပါတယ်။
ယူနိုက်တက်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အဆင့် ၆ နေရာရပ်တည်နေတာကြောင့် လာမယ့်ရာသီ ချန်ပီယံလိဂ်ယှဉ်ပြိုင်ချင်ရင် ရလဒ်ကောင်းတွေရယူနိုင်ဖို့ လိုအပ်နေတာပါ။နည်းပြ အဲရစ်တန်ဟတ်က ချန်ပီယံလိဂ်ကနေ ထွက်ခဲ့ရတဲ့အတွက် နောင်တရာစရာမရှိဘဲ ဒီကနေ သင်ယူမှုတွေပြုလုပ်ရမယ်လို့ ဆိုခဲ့ပါတယ်။
အဲရစ်တန်ဟတ်က “ကျနော်တို့ ဒီပြိုင်ပွဲကနေ သင်ယူမှုတွေပြုလုပ်ရပါမယ်။ချန်ပီယံလိဂ်မှာ ကျနော်တို့ ဘောလုံးကောင်းမွန်စွာကစားနိုင်ခဲ့ပါတယ်။ဒီကနေပြီး ပရီးမီးယားလိဂ်မှာ ကောင်းမွန်တဲ့ စွမ်းဆောင်ရည်အချို့ကို ရယူရပါမယ်။ကျနော်တို့ ချန်ပီယံလိဂ်ပြိုင်ပွဲကို ပြန်လာချင်ပါတယ်”လို့ ဆိုခဲ့ပါတယ်။
ယူနိုက်တက်အသင်းဟာ ဒီရာသီ ပြိုင်ပွဲစုံ ၂၄ ပွဲမှာ ၁၂ ပွဲအထိရှုံးနိမ့်ထားပြီး လာမယ့် ပရီးမီးယားလိဂ်ပွဲစဉ်အဖြစ် လီဗာပူးလ်အသင်းနဲ့ ယှဉ်ပြိုင်ရမှာဖြစ်ပါတယ်။