ကိုပင်ဟေဂင်အသင်းနည်းပြ နီးစထရပ်က ချန်ပီယံလိဂ်ပြိုင်ပွဲမှာ မန်စီးတီးအသင်းကို အရေးနိမ့်ပြီး သူတို့ပြိုင်ပွဲကနေ ထွက်ခွာခဲ့ရပြီးနောက် ဒီရာသီချန်ပီယံလိဂ်ဖလားကို မန်စီးတီးအသင်းပဲ ရယူနိုင်လိမ့်မယ်လို့ဆိုခဲ့ပါတယ်။
မန်စီးတီးအသင်းဟာ ကိုပင်ဟေဂင်အသင်းနဲ့ပွဲမှာ ပြီးခဲ့တဲ့ ယူနိုက်တက်အသင်းနဲ့ ပွဲစဉ်က ပွဲထွက်လူစာရင်းကို ၇ ဦးအထိအပြောင်းအလဲပြုလုပ်ပြီး ပွဲထွက်ခဲ့ပေမယ့် ၃ ဂိုး-၁ ဂိုးနဲ့ အနိုင်ရခဲ့ပြီး နှစ်ကျော့ပေါင်းရလဒ် ၆ ဂိုး-၂ ဂိုးနဲ့ ကွာတားဖိုင်နယ်ကို တက်နိုင်ခဲ့တာပါ။မန်စီးတီးအသင်းဟာ ပြီးခဲ့တဲ့ရာသီက ချန်ပီယံလိဂ်ပြိုင်ပွဲမှာ ချန်ပီယံဖြစ်ခဲ့သလို ဒီရာသီမှာလည်း ထပ်ပြီးရယူနိုင်ဖို့ ရေပန်းစားနေတာဖြစ်ပါတယ်။
ကိုပင်ဟေဂင်နည်းပြ နီးစထရပ်က”သူတို့ဟာ ချန်ပီယံလိဂ်ဖလားကို ထပ်ပြီးရယူနိုင်ပါလိမ့်မယ်။သူတို့ဟာ အရာရာတိုင်းအတွက် အဆင့်တက်နေပါပြီ။ကျနော်တို့ မန်စီးတီးနဲ့ ၂ ရာသီဆက်တိုက်ကစားခဲ့ရပြီး သူတို့ပိုပြီးကောင်းလာပါတယ်။သူတို့မှာ ထိပ်တန်းကစားသမားတွေရှိပြီး ဖွဲ့စည်းပုံကလည်း အံ့မခန်းပါပဲ။သူတို့ဟာ အလုပ်လည်း ကြိုးစားကြတယ်”လို့ ဆိုခဲ့ပါတယ်။
မန်စီးတီးအသင်းနည်းပြ ဂွာဒီယိုလာက သူတို့ဟာ ချန်ပီယံလိဂ်ဖလားကို ထိန်းသိမ်းနိုင်မယ်လို့ ယုံကြည်ကြောင်း ပြောထားခဲ့တာပါ။အဲ့ဒါကြောင့် မန်စီးတီးအသင်း ချန်ပီယံလိဂ်ဆုဖလား ဆက်ထိန်းသိမ်းနိုင်မလားဆိုတာ စောင့်ကြည့်ရမှာဖြစ်ပါတယ်။
