ဆာနေးရဲ့ မျက်နှာကို လက်သီးနဲ့ ထိုးခဲ့တဲ့ မာနေးကို ၁ ပွဲပယ်ပြစ်ဒဏ်နဲ့ ဒဏ်ကြေးငွေသာ ချမှတ်ခဲ့တာဖြစ်လို့ ဆီနီဂေါကစားသမားဟာ မန်စီးတီးနဲ့ ချန်ပီယံလိဂ်ကွာတားဖိုင်နယ်ဒုတိယအကျော့ ပွဲစဉ်အတွက် အသင်းလူစာရင်းမှာ ပြန်ပါလာမယ်လို့ ဘိုင်ယန်မြူးနစ်နည်းပြ တူချယ်လ်က ပြောခဲ့ပါတယ်။
မာနေးဟာ မန်စီးတီးအသင်းကို အရေးနိမ့်ခဲ့တဲ့ ချန်ပီယံလိဂ်ကွာတားဖိုင်နယ်ပွဲစဉ်ရဲ့ပထမအကျော့အပြီး အဝတ်လဲခန်းထဲမှာ ဆာနေးရဲ့ မျက်နှာကို လက်သီးနဲ့ ထိုးခဲ့တာကြောင့် ဂျာမန်ကစားသမားဟာ နှုတ်ခမ်းကွဲသွားခဲ့တာဖြစ်ပါတယ်။
အဲ့ဒါကြောင့် မာနေးဟာ အသင်းရဲ့အရေးယူခြင်းကို ခံခဲ့ရပြီး လာမယ့် ဟော်ဖန်ဟိမ်းနဲ့ ပွဲအတွက် အသင်းလူစာရင်းမှာ ချန်လှပ်ခံခဲ့ရပါတယ်။မာနေးဟာ နောက်ထပ်ပွဲတွေမှာတော့ အသင်းအတွက် ပြန်ပါဝင်ခွင့်ရမယ်လို့ နည်းပြ တူချယ်လ်က အတည်ပြုခဲ့တာပါ။
တူချယ်လ်က “ကျွန်တော်သူတို့နဲ့ စကားပြောခဲ့ပြီး အခြေအနေတွေကိုလည်း ရှင်းခဲ့ပြီးပါပြီ။ဒါက လိုအပ်ပါတယ်။ဒီလိုဖြစ်ပျက်တာမျိုးက ဒီအသင်းဟာ ပထမဆုံးအသင်းမဟုတ်သလို နောက်ဆုံးအသင်းလည်းမဟုတ်ပါဘူး။အဝတ်လဲခန်းထဲမှာ ဖြစ်ပျက်တဲ့အရာတွေက အဝတ်လဲခန်းထဲမှာပဲ ရှိနေရင်ကောင်းမှာပါ”
“လူတိုင်းဟာ အမှားကျူးလွန်တက်ပြီး နမူနာယူရမှာပါ။မာနေးဟာ ယုံကြည်မှုကင်းမဲ့နေပြီး ဒီမှာရှိတဲ့ ဘောလုံးယဉ်ကျေးမှု၊မတူညီတဲ့ အခန်းကဏ္ဍ၊မတူညီတဲ့အသင်းနဲ့ လိုက်လျောညီထွေဖြစ်အောင်လုပ်ရမှာပါ။ဒါကြောင့်လည်း သူဟာ ခြေတစ်လှမ်းဆုံးရှုံးခဲ့ရတာပါ”လို့ ပြောခဲ့ပါတယ်။
မာနေးဟာ လီဗာပူးလ်အသင်းကနေ ရောက်ရှိလာပြီးကတည်းက ဘိုင်ယန်မြူးနစ်မှာ အသားကျဖို့ ရုန်းကန်နေရပြီး ပွဲထွက်ပါဝင်နိုင်ဖို့လည်း ခက်ခဲနေတာဖြစ်ပါတယ်။