ပီအက်စ်ဂျီအသင်းဟာ အခုရာသီအကုန်မှာ အသင်းနဲ့ စာချုပ်ကုန်ဆုံးတော့မယ့် မက်ဆီကို စာချုပ်သက်တမ်းတိုးဖို့အတွက် ဆွေးနွေးမှုတွေလုပ်ဆောင်နေတယ်လို့ ပီအက်စ်ဂျီဒါရိုက်တာ ကမ်ပို့စ်က ပြောခဲ့ပါတယ်။
လက်ရှိအချိန်မှာ မက်ဆီကိုခေါ်ယူဖို့ အသင်းဟောင်း ဘာစီလိုနာနဲ့ မေဂျာလိဂ်ကလပ်အသင်းတွေက စိတ်ဝင်စားနေကြတာဖြစ်ပါတယ်။အဲ့ဒါကြောင့်လည်း ပီအက်စ်ဂျီက စာချုပ်သက်တမ်းတိုးဖို့ကိစ္စကို အမြန်ဆုံးဖြတ်လုပ်ဆောင်ချင်နေတာပါ။
လူးဝစ်ကမ်ပို့စ်က “ကျွန်တော်တို့ဟာ သူ့ကိုစာချုပ်သက်တမ်းတိုးချင်တာကြောင့် သူနဲ့ဆွေးနွေးမှုတွေပြုလုပ်နေပါတယ်။ကျွန်တော်တို့က သူ့ကိုဒီပရောဂျတ်မှာဆက်ပြီး ထားချင်ပါတယ်။ဒီရည်ရွယ်ထားတဲ့အရာကိုရောက်ဖို့အတွက် ကျွန်တော်တို့အခုပြောဆိုနေကြတာပါ။မက်ဆီက ကျွန်တော်တို့နဲ့အတူ ဆက်ရှိနေမှာပါ”လို့ ပြောခဲ့ပါတယ်။
မက်ဆီဟာ မကြာသေးခင်က ပီအက်စ်ဂျီအသင်းနဲ့ စာချုပ်သက်တမ်းမတိုးဘဲ ထွက်ခွာနိုင်တယ်လို့ သတင်းတွေထွက်ပေါ်နေတာဖြစ်ပါတယ်။ဒါပေမယ့် ကစားသမားဆီကနေတော့ တရားဝင်ပြောဆိုတာမျိုးတော့မရှိခဲ့တာဖြစ်ပါတယ်။
မက်ဆီဟာ ဒီရာသီမှာ ပီအက်စ်ဂျီအတွက်ခြေစွမ်းပြနေပြီး တူးလော့စ်ကို အနိုင်ရခဲ့တဲ့ လီဂူးဝမ်းပွဲစဉ်မှာ အသင်းအတွက် အနိုင်ဂိုးသွင်းယူပေးခဲ့တာဖြစ်ပါတယ်။