ပီအက်စ်ဂျီနည်းပြ ဂယ်လ်တီယာက မက်ဆီအနေနဲ့ ခံစစ်ပိုင်းအလုပ်တွေကနေ ကင်းလွတ်ခွင့်ရှိပြီး အသင်းအနေနဲ့ ကြယ်ပွင့်ကစားသမား လွတ်လပ်စွာလုပ်ဆောင်နိုင်အောင် ကြိုးကြိုးစားစားလုပ်ဆောင်ဖို့ ပြောလိုက်ပါတယ်။
မက်ဆီဟာ ပီအက်စ်ဂျီအသင်းက တူးလော့စ်အသင်းကို ၂ ဂိုး- ၁ ဂိုးနဲ့အနိုင်ရခဲ့တဲ့ ပြင်သစ်လီဂူးဝမ်းပွဲစဉ်မှာ အသင်းအတွက် အကောင်းဆုံးခြေစွမ်းပြပြီး အနိုင်ဂိုးသွင်းယူခဲ့တာပါ။ဒီပွဲမှာ နေမာနဲ့ ဘတ်ပီတို့ မပါဝင်ခဲ့လို့ မက်ဆီက အသင်းရဲ့တိုက်စစ်ကို ဦးဆောင်ခဲ့ရတာဖြစ်ပါတယ်။
ဂယ်လ်တီယာက “လီယိုအတွက်ကစားပေးပြီး သူ့အတွက်အလုပ်လုပ်ပေးဖို့ အသင်းကို ကျွန်တော်တောင်းဆိုပါတယ်။သူဟာ တစ်ချို့သောလုပ်ဆောင်မှုတွေကနေ ကင်းလွတ်ရပါမယ်။အသင်းဖော်တွေဟာ သူတို့ရဲ့ကြိုးစားအားထုတ်မှုကို ၂ ဆမြှင့်တင်ရပါမယ်။အဲ့ဒါမှလည်း နေရာလွတ်တွေကို ရှာဖွေပေးနိုင်မှာ”လို့ ဆိုခဲ့ပါတယ်။
ဒီပွဲမှာ တူးလော့စ်က ဦးဆောင်ဂိုးစတင်ရယူနိုင်ခဲ့ပေမယ့် ဟာကီမီနဲ့ မက်ဆီက ပီအက်စ်ဂျီအတွက် ချေပဂိုးနဲ့ အနိုင်ဂိုးတွေသွင်းယူပြီး ပီအက်စ်ဂျီအတွက် အနိုင် ၃ မှတ်ရှာဖွေပေးနိုင်ခဲ့တာဖြစ်ပါတယ်။
ပြင်သစ်လီဂူးဝမ်းအမှတ်ပေးဇယားကို ဆက်လက်ဦးဆောင်နေတဲ့ ပီအက်စ်ဂျီအသင်းဟာ ကြားရက်မှာ ပြင်သစ်ဖလားပွဲစဉ်အဖြစ် မာဆေးလ်အသင်းနဲ့ယှဉ်ပြိုင်ရမှာဖြစ်ပါတယ်။
