တိုက်စစ်မှူး အိုဆီမန်က နာပိုလီအသင်းအပေါ်မှာ မယိမ်းမယိုင်တဲ့ ချစ်ခြင်းတွေရှိပြီး ပရိသတ်တွေအကြားမှာ စည်းလုံးမှုရှိဖို့ တိုက်တွန်းလိုက်ပါတယ်။
နာပိုလီအသင်းဟာ အိုဆင်ဟမ်ရဲ့ပင်နယ်တီလွဲတဲ့ ဗီဒီယိုကို Tik Tok မှာ လှောင်ပြောင်သလို တင်ခဲ့တာကြောင့် အိုဆင်ဟမ်နဲ့ အသင်းကြားအဆင်မပြေမှုတွေရှိခဲ့ပေမယ့် နောက်ပိုင်းမှာ ကလပ်အသင်းက ဒါဟာ တိုက်စစ်မှူးအပေါ်မှာ စော်ကားလိုတဲ့ ရည်ရွယ်ချက်မရှိဘူးလို့ ပြောခဲ့တာပါ။အိုဆင်ဟမ်ဟာ ဒီအဖြစ်အပျက်ဖြစ်ပြီးနောက် နာပိုလီအသင်းအတွက်ပါဝင်ကစားပေးခဲ့တဲ့ ၂ ပွဲစလုံးဂိုးသွင်းယူနိုင်ခဲ့ပါတယ်။
အိုဆင်ဟမ်ဟာ လက်ချီကို အနိုင်ရတဲ့ ပွဲအပြီးမှာ သူ့ရဲ့အင်စတာဂရမ်ကနေ သူဟာ နာပိုလီအသင်းကို ချစ်မြတ်နိုးကြောင်း ထုတ်ဖော်ပြောသွားခဲ့တာပါ။
အိုဆင်ဟမ်က “၂၀၂၀ ခုနှစ်မှာ နေပယ်လ်ကို လာရတာ ကျွန်တော့်အတွက် အလွန်ကောင်းမွန်တဲ့ ဆုံးဖြတ်ချက်ပါ။နေပယ်လ်မြို့ကလူတွေက ကျွန်တော့်ကို ချစ်ခြင်းမေတ္တာတွေနဲ့ ကြင်နာမှုတွေကို ပေးခဲ့ပါတယ်။ကျွန်တော်တို့ ကြားထဲမှာ ဘယ်သူ့ကိုမှ လာရောက်ခွင့်မပြုနိုင်ပါဘူး”
“ကျွန်တော်ဂုဏ်ယူစွာနဲ့ ဝတ်ဆင်ထားတဲ့ ဒီတံဆိပ်ကို ချစ်မြတ်နိုးမှုကတော့ မယိမ်းမယိုင်ပါပဲ။စည်းလုံးမှု၊လေးစားမှု၊ နားလည်မှုတို့ကို ဆက်ပြီးဖြန့်ကျက်ကြပါစို့။နာပိုလီထာဝရအောင်မြင်ပါစေ”လို့ ရေးသားခဲ့တာဖြစ်ပါတယ်။
အိုဆီမန်ဟာ နာပိုလီအသင်းအတွက် ၁၀၉ ပွဲပါဝင်ကစားထားပြီး ၆၄ ဂိုးသွင်းယူကာ ပြီးခဲ့တဲ့ရာသီက စီးရီးအေဖလားအောင်မြင်မှုကို ရယူနိုင်ခဲ့ပါတယ်။
