ယူနိုက်တက်နည်းပြ အဲရစ်တန်ဟတ်ဟာ ဘာစီလိုနာ၊နယူးကာဆယ်တို့နဲ့ ကစားရမယ့် အရေးကြီးပွဲစဉ်မတိုင်ခင်မှာ အသင်းရဲ့ဂန္တဝင်နည်းပြကြီး ဆာအဲလက်စ်ဖာဂူဆန်နဲ့ တွေ့ဆုံပြီး ညစာအတူစားသုံးခဲ့ကြတာဖြစ်ပါတယ်။
ယူနိုက်တက်အသင်းဟာ ဒီတစ်ပတ်ထဲမှာ ဘာစီလိုနာနဲ့ ယူရိုပါလိဂ်ပလေးအောဖ့်ဒုတိယအကျော့၊ နယူးကာဆယ်နဲ့ ကာရာဘောင်းဖလားဗိုလ်လုပွဲယှဉ်ပြိုင်ရဖို့ ရှိနေပါတယ်။နည်းပြ အဲရစ်တန်ဟတ်ကတော့ ဒီပွဲမတိုင်ခင်မှာ အသင်းနဲ့ဆုဖလားအောင်မြင်မှုအများအပြားရယူနိုင်ခဲ့တဲ့ နည်းပြကြီး ဖာဂူဆန်နဲ့ တွေ့ဆုံခဲ့တာပါ။
ဒီအကြောင်းကို ဘာစီလိုနာနဲ့ ကစားရမယ့် ပွဲမတိုင်ခင်ပြုလုပ်တဲ့ ပွဲကြိုသတင်းစာရှင်းလင်းပွဲမှာ ပြောခဲ့တာဖြစ်ပါတယ်။
အဲရစ်တန်ဟတ်က “ကျွန်တော်ဟာ ဗဟုသုတ၊ အတွေ့အကြုံအများကြီးရှိတဲ့သူတွေနဲ့ စကားပြောရတာကို နှစ်သက်ပါတယ်။သူက အတွေ့အကြုံတွေကို ပြန်မျှဝေပါတယ်။သူက ယူနိုက်တက်က သူ့ကလပ်လို့ခံစားနေရပါတယ်။သူက ကျွန်တော်တို့ကို အကောင်းဆုံးဖြစ်စေချင်တယ်။အလွန်ကောင်းမွန်တဲ့ညတစ်ညဖြစ်ခဲ့ပါတယ်”လို့ ဆိုခဲ့ပါတယ်။
ဖာဂူဆန်ဟာ ၂၀၀၈ က ချန်ပီယံလိဂ်ဆီမီးဖိုင်နယ်ပွဲစဉ်အဖြစ် အိုးထရက်ဖိုဒ့်မှာ ကစားခဲ့တဲ့ ဒုတိယအကျော့ပွဲစဉ်မှာ ဘာစီလိုနာအသင်းကို ၁ ဂိုး- ဂိုးမရှိနဲ့ အနိုင်ရပြီး ယူနိုက်တက်ကို ဗိုလ်လုပွဲပို့ဆောင်ပေးခဲ့တာပါ။
ဗိုလ်လုပွဲမှာ ယူနိုက်တက်အသင်းဟာ ချယ်လ်ဆီးအသင်းကို ပင်နယ်တီအဆုံးအဖြတ်မှာအနိုင်ရပြီး ချန်ပီယံဆုကို ရယူနိုင်ခဲ့တာဖြစ်ပါတယ်။
